明言想入澳博董事會

【蘋果日報】「有機會（入董事會）梗係好，實想㗎！」何猷亨想入澳博（880）董事會之心，可謂路人皆知，他訪問時解釋：「（澳博）係我父親一手創立，我對公司特別有感覺，入董事會就好似讀書拎到一級榮譽畢業咁，係大家對我嘅肯定。」
賭王何鴻燊年中退任澳博主席，董事會成為二、三及四房三分天下局面，還有不少老臣子如行政總裁蘇樹輝等輔政，各派系各有打算，但共通點均是資歷夠、有話語權，而何猷亨年紀則明顯年輕得多。
相關新聞：年僅25歲　賭業地產慈善瓣瓣有何猷亨：時間係逼出嚟
大讚何家哥哥姐姐
但他強調，年紀輕不會影響他與老臣子的溝通，更多番「賣口乖」，先讚澳博是行業始祖，但同時敢創新，例如即將面世的新項目「上葡京」，特別針對休閒娛樂，引入不少高檔餐飲；之後更謙稱要向各位執董學習，令自己有成長及進步的機會。問到若「入局」會否為澳博帶來新氣象，他稱「唔會係我可以帶啲咩新景象畀公司，我係要更加跟佢哋學習。」
講到學習，除了澳博中人，他亦大讚何家哥哥姐姐，「會覺得Pansy（何超瓊）家姐嘅睿智，令佢工作上可以做到好多果斷而正確決定；Lawrence（何猷龍）哥哥嘅眼光，令到佢嘅事業走出國際；Daisy（何超鳳）家姐嘅魄力，佢同時發揮喺公司同社會工作，近年喺保良局同公司，亦見到佢真係幫咗好多人。我以上講嘅嘢，全部都係我有需要學習嘅」。