莫乃光斥法例過時　又憂政府封殺

【蘋果日報】資訊科技界立法會議員莫乃光指，早前收到不少電競公司反映牌照問題，Godzpeed亦有向他反映經營苦況。他直斥現行法例過時，相關部門不斷拖拖拉拉，向政府反映卻恐怕「落閘」封殺。
莫乃光指出，曾向創科局反映，「傾過幾次，佢哋畀我嘅答覆就係『睇緊』，最大問題係牌照唔係經創科局發出，係經民政事務總署（民政署），仲要現行嘅牌照都未必適合現時嘅電競場所，之後就不斷拖拖拉拉。」
業界盼政府盡快有定案
他建議業界投資電競時要相當小心：「培訓又唔得、訓練場又唔畀、工廈又唔可以做、又唔可以開畀公眾，到時警察又走上嚟話係遊戲機舖，牌又拎唔到，你叫人點做？」他直斥現時《公眾娛樂場所牌照》十分過時：「咩細路入去大人唔畀入，驚教壞，講緊我十幾歲發生嘅事，現時仲有冇人講呢啲嘢？」
早前莫乃光亦就有關問題向政府查詢，得出回應與《蘋果》受到回覆相若。有不願公開姓名的業界人士指，有聽聞經營模擬賽車中心的行家，受到民政處同樣對待：「好多都係照做，因為現時係牌照未分到類，唔係佢哋問題，都係等政府幾時有正式牌照可以申請。」九龍電競館創辦人鄺君賢就指，希望政府盡快有定案，令業界可安心發展事業。
長青網 - 一站式長者及護老者生活資訊網站