硬撼國家機器　李卓人告急　「用選票攞返我哋嘅香港」

【蘋果日報】【九西補選　明日投票】如果無DQ，九西毋須補選；如果不是政治打壓，劉小麗應能再入閘；如果再失地區直選議席，立會以致香港在保皇黨把持下勢必淪陷。代表民主派出戰九西補選的李卓人，背負港人既有價值與理念，卻遭建制派陳凱欣與被指鎅票的馮檢基夾擊，李昨午宣佈選情告急，指民調不能反映保皇黨鐵票，而中共正開動國家機器為陳助選，強調今次選舉是為香港未來定位，「我嘅危即係香港嘅危」，希望選民11.25以選票「（一齊）攞返我哋自己嘅香港」。
記者：梁穎妍
「撐李卓人即係撐自己」，民主派昨午在黃埔站外為選情嚴峻的李卓人造勢。公民黨前立法會議員余若薇指，如果民主派能在此仗於地區直選取回一席，「真係可以攞返少少否決權，發揮影響力……呢個真係關鍵一席，民主派有冇機會翻身，就係睇（選民）有冇一念去投票」。民主黨前主席劉慧卿也指李卓人的選情告急，民主派會全力助選，力保香港原有核心價值不變，眾志黃之鋒、社民連長毛梁國雄等人也現身力撐。
不想香港變大陸城市
李卓人指雖有民調顯示其支持度領先，但是他指民調未能反映保皇黨鐵票，調查結果也顯示姚松炎3.11九西補選所得票數，他亦未能盡取，加上部份民主派支持流向另一對手馮檢基，目前最關鍵可能是超過兩成游離選民意向，指相關選民意向極度關鍵，「要全投3號，李卓人先有得贏」。
年初3.11九西補選，民主派已在形同單議席單票制下敗陣，李卓人受訪時直言今次補選再輸不得、也輸不起：「香港最關鍵問題擺喺我哋面前，係我哋嘅未來，想係國際城市定係大陸另一個城市？」他希望市民留意，補選戰場其實是香港未來理念的對碰，指近日連串事件反映香港前途堪憂，包括特區政府拒絕外國記者會前第一副主席馬凱入境，「人哋（國際）會覺得新聞自由都冇埋，仲唔係大陸城市？」近日美國國會更指控北京干預香港，甚至提出要將香港與內地視為同一關稅區，「連（自由黨）鍾國斌都抄我哋講話香港玩完啦！」但陳凱欣竟指馬凱事件與港獨有關，「連林鄭（月娥）都未夠膽講，睇到保皇陣營可以去到盡幫中共」。
奪回議席最實際一點是可以在分組點票地區直選與建制派平手下，頂住再次「加辣」修改《議事規則》的建議，而日後建制派提出的無約束力動議也不會無往而不利。
李更擔心倘不幸落敗，建制派會任意演繹選舉結果，甚至引起骨牌效應，「兩次補選（民主派）都贏唔到個議席，啲人咪話係（特首）林鄭掂囉，DQ大家都冇感覺，仲有政治檢控、東大嶼計劃，我哋呢邊好清楚反對一萬億（元）掉落鹹水海，咁保皇黨梗係撐政府，佢（政府）咪話大家都唔緊張，林鄭咪可以去囉」。
「我嘅危係香港嘅危」
不少聲音看淡李的選情，李慨嘆北京紅線DQ劉小麗，「我係臨危受命」，再披戰衣的他牌頭不單是工黨，而是整個民主派，「我唔係想將自己講到我代表晒香港人，但我哋真係代表緊香港人嘅嗰種理念、價值，所以我嘅危係香港嘅危」，他強調民主派仍有不少仗要打，「問題係唔好放棄囉，最大敵人就係我哋自己放棄，自己放棄埋香港」。補選參選人還有伍廸希及曾麗文。