中環在線：太地同天貓搞「新零售」

【蘋果日報】港珠澳大橋開通之後，人潮逼爆東涌，東薈城業主之一太古地產（1972）負責管理埋呢個場，啲高層見到人流多到咁，肯定笑到見牙唔見眼，諗定加幾多租喇。吸到內地客都唔止，太古地產最近拍埋阿里巴巴馬雲碼頭㖭呀。
阿里巴巴嘅「雙11購物節」就快到，太古地產「應節」地宣佈，同阿里旗下天貓達成新零售合作協議，將天貓嘅零售科技引入太地喺內地五個商場，包括北京三里屯太古里、頤堤港、上海興業太古匯、廣州太古匯，同埋成都遠洋太古里。
新零售係咩概念呢？根據公司介紹，其中「天貓智慧商店」，客人喺參加計劃嘅實體商戶濕平時，濕平流程由定單到送貨全面數碼化。另外一個「天貓智能育嬰室」，媽媽可以利用自動販賣機，即時買入育嬰必需品。就咁聽落，好似係去實體店做網購咁，究竟有幾「智能」呢？搵日真係要去體驗下。
李華華
LiWaWa@AppleDaily.com