澳門居民慨嘆　年輕人做房奴

【蘋果日報】港珠澳大橋通車，掀起三地樓價上升。澳門居民古太（圖）表示：「十幾年前買樓嗰陣都冇話港珠澳大橋概念，但現時地產賣樓，都提到大灣區，港珠澳大橋通車啦！嗰度樓價就嚟升！實際通車後，嗰度交通會好堵塞，路又唔夠。」
一講樓價，古太越講越有火，「個樓價係唔啱數㗎！你係年輕人，你計到數，自己工資收入同樓價，樓價值唔值呀？你即使有屋企人幫助你，你都要做一世房奴，做到68歲。（建築呎價升穿1萬元）點買！現時揸住嚿錢，都唔會掟落呢個樓價度。（有人話投資，仲有得升？）我唔識，我唔敢講，我唔識嗰樣嘢係咪有投資價值，我唔係做地產嗰行，但自己嘅感受，你睇下，民生嘅嘢嚟㗎嘛，一般人工資收入同樓價相比，你要做幾多年先儲到首期？俾咗兩成首期、或三成首期，你要供幾多年先甩得身？一世人就為咗嗰層樓綁死晒喺度。」被問有冇為仔女買樓？她回應：「有，梗要幫佢，唔係佢點搞。今年初以建築計每9,000幾元買入（路環）金峰．名匯，嗰度好啲，呢度多數畀三成首期，（咁你幫幾多首期？）唔方便講啦，佢都有自己努力！」