【姐匙Talk】笑呵呵賺到盡犧牲經理人

【蘋果日報】藝人同傳媒嘅關係一直都好矛盾，一方面應該係唇齒相依，但好多時大家都變成敵對。至於，藝人同身邊嘅工作夥伴，當然應該一條心，尤其係經理人同藝人之間，一定要坦承合作，互相尊重同配合，直接啲講就係有錢齊齊搵，有禍就一齊拆彈搞掂佢！
不過，唔係個個藝人都咁諗，有錢梗係想賺盡，但經理人嗰份呢，啲錢係我搵番嚟㗎喎！唔好分咁多得唔得呀？話說有個喺娛樂圈都打滾咗好多年嘅「笑呵呵」，歌影視三個範疇都有份參與，而且全部有名有姓，絕對唔係二打六角色，咁多年雖然佢唔稱得上係一線，但行出街大多數人都認得佢，人前嘅形象都算正面，但係人後呢，佢嘅人格就好似有啲啲問題喇！
改抽佣比例
我姐匙就聽過幫過笑呵呵嘅「牛仔」，早幾年同笑呵呵做嘢嗰陣受咗好大委屈，最後索性唔撈。話說牛仔同笑呵呵合作咗一段時間，一向以8：2分賬，即係藝人佔收入八成，牛仔就佔兩成，大家都合作得好愉快，而笑呵呵之後因為出過啲都算幾正面嘅新聞，工作量同收入都增加咗，笑呵呵就忽然「肉痛」被抽佣兩成，竟然提出將兩成佣金改為2%，即係話笑呵呵以前收開十萬，要畀牛仔抽兩萬，依家就想改成二千，原因係佢覺得好多客戶都係自動登門搵佢。講到呢度，我姐匙都唔知講乜好，惟有提醒一下笑呵呵，「發財立品」呢四個字好重要㗎！
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。