財經專題：英國物業代理踢爆掠水伎倆

【蘋果日報】近年港人愛買海外樓，於英國曼徹斯特唐人街開設物業代理公司的葉謙信，見盡部份同行以利益為先，專揀海外業主掠水，「就係蝦你唔會特登買張機票，飛過嚟追究！」他呼龥華人應團結起來。
記者：陳家恩
阿謙接觸的港人中，投資曼徹斯特物業，僅約5%為自住，其他絕大多數為投資收租。「好多時投資者唔熟地頭，純粹聽發展商講，買咗啲冇乜流動性嘅地區。」不過他認為最棘手的不是買錯地點，而是租務處理不當。他舉例指有發展商保證首年回報後，便對往後的物業管理愛理不理，甚至丟空單位，「無租金回報收入的話，買個物業嚟做咩？倒不如買股票。」
頻簽短期租約多收佣
此外，發展商或託管公司濫收費用，同樣令買家頭痕。「琳琅滿目的隱藏收費（hidden cost）或額外費用（extra cost），例如上門裝修報大數、幫你上門開一開門又收錢，海外業主收到單據時疑惑，點解管理費咁高？細睇先發現，濫收費用係好常見。」有託管公司深知海外業主「唔會特登買張機票飛過嚟追究！」，睇中其弱點密密收取費用。
講起掠水伎倆，阿謙分享有同行喜歡與租戶簽署短期租約，「英國定義下，半年以內為之短期租約，半年以上則為長期，簽半年的好處是約滿再續簽時，可以收取相當於半個月租金費用的佣金，呢啲伎倆係幾好搵㗎！」
兩招分辨租霸避中伏
租金回報被蠶食，遇上租霸更雪上加霜。阿謙經驗之談指，租霸一般會繞過中介直接聯絡業主，避免被中介「問長問短」，加上一般業主不會花時間做背景審查，因此亦較易中招。他個人亦有兩招分辨租霸，「感覺上租霸講嘢比較浮誇，同時間如果你問佢問題，問得仔細啲，佢哋又會講得唔清唔楚，瑟瑟縮縮。」
對於託管物業時，出現糾紛或懷疑中介濫收費用，阿謙提醒投資者是有權更換中介或「轉會」；至於一般在簽署租約時，他建議簽不多於兩年時間，一旦遇上租霸都有「止蝕」的期限。