行政手段阻民間參與環評

【蘋果日報】在港珠澳大橋司法覆核案中，上訴庭指出工程倡議者有責任減低污染，否則環保署不會通過環評報告，但實情如何？資深工程師黎廣德指出，自港珠澳大橋官司後，政府不但未有改善環評報告，更以行政手段阻撓民間參與，負責審批政府基建項目的環境諮詢委員會審批程序封閉，其成員全由政府委任，猶如橡皮圖章，未能履行把關責任。
環諮會成員全政府委任
黎廣德接受本報訪問時指出，自港珠澳大橋官司後，政府不但未有改善環評報告，更以行政手段阻撓民間參與，「例如整晒啲英文報告，唔繙譯成中文，等一般市民消化唔到，或者係大叠英文報告，唔擺上網，你要走上寫字樓攞嚟睇，呢啲小動作就已經阻止好多公民參與，根本談不上改善，制度更加封閉咗」，但他承認設中文版本及上網查閱並非法例規定，以往亦非所有基建工程設有相關行政便利。
黎廣德稱，政府在西部仍有多個項目如機場三跑，工程會對環境增加額外污染物，但政府「側側膊」，相關環評獲通過，「政府當然有好多技術嘅原因令佢通過，好似通過呢啲項目只需經環諮會，但事實上環諮會不但未能把關，反而協助政府過關」。
黎廣德指出，環諮會成員由政府委任，審批程序封閉，「例如佢係閉門會議，只係畀申請人出席去申述，反對人係無權出席會議，除非特別邀請，但好多時都唔會作出邀請，所以反對嘅人無權利申述」。他稱，政府只需「擺多啲人入去做舉手機器」，「即使裏面有心人都係佔少數，不能改變大局」。
黎廣德又指出，2000年落馬洲支線引發的塱原環評風波，是唯一一次政府的大型基建工程遭環保署否決，「因為嗰時環保署署長係科學家」，自該事件後，政府改由政務官出任環保署署長，其後更由環境局常任秘書長兼任該職，專業成疑。
另黎廣德指出，現時靠司法覆核制度挑戰政府基建項目需花很大成本，「對社會成本好大，對申訴人嘅成本更加大，好似朱婆婆，佢第一次贏咗官司，但第二次輸咗，本來佢可以繼續申請法援向終審法院上訴，終審法院好大機會會贏返，但佢當時受到好大壓力，住喺東涌，受到好多居民同建制派政黨好大壓力，（令）佢唔願意或者佢屋企人都唔願意繼續打呢單官司，變咗公義得唔到申張」。
■記者謝明明