應邀做「白老鼠」試療程OL激光去紋慘變燒爛肚

【蘋果日報】【貪靚惹禍】「如果之前話我知會出血、會有疤，你畀多多錢我都唔會做！」30多歲的陳小姐（化名）每當想起下腹因激光燒傷留下一條條猙獰的疤痕，依然憤憤不平。雖然傷口慢慢癒合，但心裏的陰霾卻無法驅散，「皮膚科醫生話呢個係二級燒傷！係從皮膚裏面燒出嚟，佢話一睇就知係打錯咗能量」。回想起在美容院做激光療程前，負責職員連麻醉藥膏都沒有塗上就直接用激光槍打在她的肚皮上，「我覺得我喺鬼門關走咗一轉」。
記者：賴莉娜
從事銀行業的陳小姐早前在WhatsApp群組結識了在薄扶林置富南區商場經營美容院「Mondello Beauty」的蔣姓女東主，對方8月底邀請她試用一款聲稱可以「去除肚紋」的二氧化碳激光（CO2 Laser）療程，「佢叫我幫佢做model（模特兒），話冇side effect（副作用）」。
無塗麻醉藥　事主忍痛半小時
陳小姐9月2日在對方催促下到其美容院，當時店內還有一男一女在場，她以為是美容院職員故未有為意，「入房前我都有再問有冇副作用，佢哋只係話『會有啲起沙、結焦』，叫我入房先再解釋」，進房後陳小姐即被要求脫衣服，「好似畀人強姦咁！你唔肯做？都畀人除晒衫咯！3、4個人圍住你，嗰一刻冇得揀囉我覺得」。
她指療程由該名女職員施行，「佢甚至唔記得消毒，後來有把聲提佢『你未消毒呀！』佢先拿拿臨唔知用啲咩求其抹一抹」，其間亦連麻醉藥膏都沒有塗上，一名男子更在沒有問准她的情況下就用手機拍攝過程。
療程期間不時有人開腔提點「車得太密」，應該拉開激光槍落點的距離，「當時已經好痛，但因為我識個女店主，基於信任佢，衫又被人拉開晒，我都唔好意思叫停」，最終忍痛大半小時後，療程才告結束。陳小姐稱當時已感到腹部劇痛，傷口開始滲血，「佢仲同我講咁樣係正常嘅，過幾日就會好」。
證二級燒傷　需轉介整形外科
不過，當晚陳小姐的傷勢開始惡化，甚至流血不止，「成個肚都係血，痛到褲都着唔到」，捱至翌日早上，她向家庭醫生求醫，隨即被轉介到皮膚科，皮膚科醫生證實她的腹部二級燒傷，因傷勢太嚴重，要轉介給整形外科跟進，「醫生話一睇就知道打錯咗能量，用嘅能量過大」。
而更令陳小姐震驚的是，事後美容院的蔣小姐才表示女職員並非她的職員，而是銷售激光儀器的「銳基醫學儀器」員工，當日在場的男子則是銳基的尹姓負責人。蔣表示，銳基曾稱該名女職員「好熟手」，惟出事後有人承認女職員「打密咗」，陳小姐才驚覺自己淪為「白老鼠」。
但蔣接受訪問時，否認沒有事先告知陳小姐該名職員並非美容院員工，又稱最初是應陳要求，免費嘗試用激光去肚紋，於是向銳基查詢該部激光儀器能否同樣去肚紋，「儀器公司話我知可以，我先叫人嚟試，始終部機係新買，我無佢哋咁專業」。