幼園教師變租務經紀曾月入逾10萬

【蘋果日報】【周末專題】黃煒炘（阿Yan）是香港3萬多名持牌地產代理之一，今年1月入行，由一名幼稚園老師變成代理界「租霸」。租霸之意當然不是租人層樓不交租的惡霸，而是近期樓市買賣兩閒，她把握這個轉租潮機會，像打麻雀密食當三番，試過一個月簽成十多單租賃成交，但做租難發達，因做十單租才等於一單買賣。
記者：朱連峰
阿Yan屬「80後」，今年30多歲，她的志願其實是做幼稚園老師，「我18歲第一份工就是做幼稚園老師」，一做就逾十年。她表示，任職幼稚園工作時間長，加上她本身有兩名兒子，一位小二，一位小三，近七年每天睡眠時間有時只有兩、三小時，長期嚴重睡眠不足下，直至去年尾，身體終於響了警號，醫生建議須停下來，不可長時間工作，惟有忍痛放下幼稚園教師這份熱愛的工作，「都好痛心，好唔捨得份工，無辦法，醫生要即刻停」。
成屯門代理界「租霸」
小休兩至三個月後，阿Yan說：「我係一個唔可以唔做嘢嘅人，唔能夠令自己零價值」，所以就選擇了工作時間較彈性的地產代理行業。「試吓入行，唔知得唔得，做落原來都適合我，同老師一樣都係靠把口搵食」。
地產代理僧多粥少，兩成人做八成人生意，阿Yan加盟屯門置安居首兩個月，主要是齋逗數千元底薪。她的第一單生意，是促成邁亞美海灣一宗月租約1.3萬元的租務成交，拆賬後分得約1,000元佣金。
近期樓市不利因素多，買家近絕迹，代理靠做租務維持生計。有一個月，阿Yan試個促成十多宗租務成交，成為屯門代理界「租霸」。當然，租霸是記者給她說笑的稱號，對於這稱呼，Yan要澄清一點，「其實我不是主力做租務」，最近樓市開始微調，想買樓的人，擔心樓價一跌就無幾十萬元，所以有七成人觀望，「但我哋都要食飯，租樓就容易些，8月就做了12單租」，她形容跑到鞋底都「蝕晒」。
跑十多單租看似容易，但每個客可能要睇十個盤，加埋要睇過百個盤。屯門以細價盤為主，當每單成交月租1萬元，阿Yan與公司拆賬後，她稱只有「萬零蚊」，只能夠在淡市密食當三番補底，十單租才等於一單買賣，要做買賣先搵到食。
講到收入，阿Yan說，地產代理多勞多得，只要勤力，收入一定多過教書，最威的一個月，她試過月入逾10萬元，與她之前任職幼稚園教師時月入2萬多元比較，升幅4倍。她強調代理收入不穩定，不會月月爆數，好天斬埋落雨柴，但她深信，「一勤天下無難事，再難嘅事也會度過，只要肯付出就冇問題，機會總係留畀有準備嘅人」。
「做代理唔好呃呃氹氹」
提起地產代理，大家腦海裏總湧現一大堆負面事。阿Yan不諱言，「經紀形象唔係太好，講嘢可信性唔係好高，正正呢點，一間屋都有好同唔好之分，人亦一樣」，她認為做代理不一定要成日呃呃氹氹，她做地產代理的宗旨、待客之道，就是盡力為客人解決疑難，「我都希望客人同我買樓係買得安心，唔希望喺不明不白情況下入市，因為（買樓）落咗定金唔係講玩，當業主收定後，想退就無得退」。
阿Yan覺得做地產代理是打耐力賽，本身教開幼稚園，都是要很有耐性和時間，這樣賺佣先賺得開心。
談起經紀生涯難忘事，阿Yan憶述今年4月一對新婚客，「個客企喺條街掙扎買唔買，同個客企足四小時，最終買咗，客人那晚很緊張，話瞓唔着，我不斷安慰及恭喜佢哋終於上車，叫佢唔好太過緊張」。一星期後，客人買了一盒蝴蝶酥送給阿Yan，因為那時是大升市，買家追都追不切，成功以約413萬元上車，買盒餅多謝她，令她大為感動。Yan深感商業化的地產市場，也不乏人情味。