中環在線：唐家成last day幸運曲奇有玄機？

【蘋果日報】話說證監會主席唐家成好鍾意喺中國會食飯後拆幸運曲奇（fortune cookie），臨別在即，佢最後一個上班日就同傳媒聚會，數完任內工作得失，忽然抬出一張擺放幸運曲奇嘅枱，中間放咗個巨型曲奇，主席一拳將曲奇打碎，內裏字條大意：「退休不在你DNA，黃金時期盛放才是你的命運」，似乎證監同事都好唔捨得主席。
唐家成亦重提舊事，六年前從畢馬威中國區主席位置上退休，就從幸運曲奇中得到一句「The best is yet to come」，現時睇返就真係甚有玄機喇，佢仲講笑話，一開始受到邀請做主席，其實都非常猶豫，事關自己好「怕醜」，唔知點應對傳媒，不過有時出席論壇，見到傳媒行家苦等咁耐都無收穫，會主動講幾句。佢現時面對提問，簡直游刃有如，唔知下任主席雷添良會否承傳佢嘅優良作風？