經濟客飯：經濟角度看沙嗲牛麵

【蘋果日報】我知即食麵同牛肉都應該少食，我都知成件事冇乜文化，但人在香港總忍唔住要食幾次沙嗲牛麵。只可惜，食過的大都麻麻，一係麵煮得差，一係不似沙嗲，一係牛肉太削，真正好食的要特登去搵。
傳統宏觀經濟學，主要關注生產和價格變化，生產只講求量的多少，生產質素是假設不變的。官方公佈的GDP和物價數據，亦會試圖扣除質素的影響，以得出質素不變下的經濟增長率和通漲率。
一碗沙嗲牛麵，足以話我聽現實係複雜有趣得多。麵，可以好認真跟足步驟煮，亦可以求其滾幾下交貨，煮到半生唔熟；牛肉，除了量有幾多，亦可選擇用廉價雪到冇味的cheap肉，又或用新鮮的上佳部位；個沙嗲醬變化多端就更唔使講了。即係話，一碗沙嗲牛麵可以維持賣三十蚊，但質素可以有無窮的變化，因為價錢以外有好多嘢可以調節。
伴隨碗麵的飲品、服務態度，以至茶餐廳到底有幾乾淨，一樣可以在碗麵價錢不變下調高調低。除了茶餐廳，其實幾乎所有我們享用的貨品和服務都是如此，除了價錢之外有各式各樣的變化。這些微妙的變化，官方數據好難準確捕捉。除了加價減價，茶餐廳會點調節一碗沙嗲牛麵？經濟差同經濟好時碗麵會點唔同？我想知道答案！
曾國平
美國維珍尼亞理工大學經濟系副教授
http://fb.com/economics3.0/
本欄逢周五刊出