驗樓直擊：長沙灣尚都驚見牛屎焊老鼠尾

【蘋果日報】百利保（617）及富豪（078）發展的市區單幢樓長沙灣尚都交樓質素一般，資深驗樓師詹濟南驗收15伙，僅1伙評分獲「8」字頭，大部份60至70分，最低見「5」字。來到第16個單位更見「牛屎焊」、「老鼠尾」相繼出沒，加上鋪磚及窗都捧蛋，雖然未至於創項目得分新低，但僅62分收場。
記者：陳家雄
詹Sir驗收尚都中層A室，實用429方呎，業主兩年前花約600萬元買入，呎價近1.4萬元，今日回望算抵。驗收前，業主滿以為富豪經營酒店，興建物業總有點質素，惟得悉詹Sir驗收此屋苑樓盤僅1個「8」字頭後，神情嚴肅。走入大廈，以單幢樓而言，每層升降機大堂算寬敞，光線充足，但當詹Sir入內敲敲廳與工作平台的地磚，就一擊即中發現空心磚，與之相對的露台與工作平台設計一樣，再敲也發現地磚空心。走出露台，欄杆留低一篤篤「牛屎焊」，反映手工差，趟門崩花亦較往常多，需要補油執返靚。
隨隊驗樓的詹Sir徒弟康仔驗緊細房時傳來一聲：「老鼠尾！」，意指地板至牆腳邊鋪磚為了就位，剪裁呈條狀或粒狀。詹Sir解釋，發展商追求地板鋪磚線紋所致，但不影響地板繞起，不扣分，純粹唔靚。抬頭一敲近間牆天花即發現空心批盪，「呢幅係磚牆，因為冷縮熱脹，牆身會移動，往往呢啲位置天花空心」。
細房對出客廳地台凸起，詹Sir認為唔整好過整，事關牽一髮動全身，既有機會令靠近工作平台地板起級容易絆腳，且隨時要拆露台門，越整越衰，反正該處不會擺任何重物，建議隻眼開隻眼閉。露台門邊又出現空心磚，因為扣實到門，而且空心剝落，日後有機會滲水。
驗樓單位只有62分
廚廁來去水無漏水，但廁所浴缸瓷磚邊多窿仔，高位現窿滲水難，但低位窿仔須關注，靠近水龍頭位置就有一個紙都插得入的窿仔必須修補，即使浴缸底有儲水池作最後防線，亦應該做好第一道屏障。全屋驗樓除了鋪磚及窗0分，客廳、細房及廚房的玻璃窗都有崩花至需要更換的地步，批盪、油漆及石材扣分亦好多，總分62分。
詹Sir補充，今次得分未創項目新低，最低分見「5」字頭，綜合目前該盤交樓的通病，包括玻璃崩花、空心磚尤其在露台位置、地板鬆，值得留意是廚房去水位，因為設計問題，部份喉管貼近廚櫃板，接駁位難扭，有機會引致滲水。
百利保發言人表示，上述單位瑕疵及清潔問題大部份已即時與業主跟進，預計數日內可完成維修。