Disco相遇　盧冠廷被飛撲

【蘋果日報】今天是陳百強60歲冥壽，早前環球推出群星翻唱Danny經典歌的專輯，後天亦會舉辦音樂會，向Danny致意。曾為Danny寫過兩首歌的盧冠廷，日前與劉美君接受《蘋果》專訪，他大讚Danny：「最鍾意《漣漪》，直情係殺死你。好難搵到咁靚仔、可以作到曲嘅歌手。我作兩隻佢都好鍾意，我覺得upgrade咗自己，因為係佢唱。」


劉美君在專輯中翻唱《粉紅色的一生》，她說：「由細個讀書聽Danny，總係覺得佢係一個憂鬱小生，到佢出《粉紅色的一生》，突然間覺得係一個好大突破，好唔同嘅一個佢，好閃令令、發光嘅Danny，我好鍾意佢唱呢隻歌嘅感覺，好正面，好陽光。」


可惜Danny的最後歲月受情緒病困擾，盧冠廷說：「以前佢見親人都開心，喺disco見到佢，佢開心到飛起，拎住披肩飛埋嚟錫咗我一啖。」Danny於35歲就離開，劉美君說：「依家冇另一個Danny，起碼冇一個令我心動嘅男歌手，咁有才華，又唱英文歌。」


採訪：余燕儀

攝影：陳俊強