財經人物：富豪私廚棄筍工追夢

【蘋果日報】24年半。盧偉權做了富豪私廚24年半，服侍過富豪家族三代人，一周工時兩、三天，舒服到不得了，卻忽然劈炮，自己開了檔「圍爐」煮順德菜，4個月瘦30磅。老友笑他戇居，年過半百還去捱世界，他卻說要追夢，開一間屬於自己的餐廳。
撰文：張浚浩　張嘉鎣
攝影：彭大偉
17歲那年，盧偉權見鳳城請人便去學廚。順德菜講究鑊氣、乾身，要快炒，他在鳳城只待了3年，一身功力，多得創辦人馮滿傾囊相授，這是他人生第一個感恩。
做飲食業遇三個感恩
學完師後到處打工，又到英國讀酒店管理，至1993年重遇老東主「阿叔」。其實「阿叔」外號並非阿叔，純粹是某上市公司主席的叔父。當時阿叔叫他歸巢，這一歸便24年半。「阿叔真係好好人，未見過佢發火，一次都冇。」阿叔是他第二個感恩。
他說，做了才知富豪私廚是舒服工，一周工作僅兩、三天，甚至更少，人工卻較市價高一點；當中最大困難是要熟悉各人口味，尤其富豪阿叔。「佢真係識食，你炒飯炒得唔夠香，落少咗蔥、湯煲得唔夠時間，佢都知……佢就同秘書講，秘書又同我講『老闆話你今日遲到，啲湯煲得唔夠時間喎』」。點食得出？「我都唔知，就係食得出。煲湯時間差太遠我都飲得出，差兩至三個鐘，連我都飲唔出」。
4年後阿叔離開公司，家族第二代接棒。新老闆明顯忙得多，不變的是，新老闆一樣和善，「佢唔會話你，湯好味就飲多幾碗，唔好味就飲一碗算」。
全家口味瞭如指掌，這是做私廚的工夫，「做私廚最大分別就係要知客人想食乜，要諗多啲新菜式。講真，日日食鮑魚都悶啦」。還要懂得睇眉頭眼額，「食物拎番嚟，剩咁多即係唔鍾意食啦，見到清晒咪鍾意食囉」。
不過，天下無不散之筵席，再開心都有散場日，「都係心願，希望自己開間舖，試吓新事物，接受挑戰」。
「依家最辛苦，做私廚186磅，依家得番160磅多啲。樂趣係，私廚只係對住幾個老闆，自己開舖所有客人口味都唔同」。雖然離職開檔，但舊公司高層、同事，甚至第三代都光顧，彷彿又成了公司飯堂。
「老闆個仔嗰日嚟我度，話早排唔得閒支持你，依家嚟食餐飯」，開局不錯，這是他人生第三個感恩。