【姐匙Talk】魔姐麻煩多多玩轉選美會

【蘋果日報】香港嘅娛樂圈只要有明星紅咗，就會北上拍劇賺人仔，但係亦有好多人用唔同途徑，爭住入行做明星。對於一班恨入娛樂圈發展嘅女仔嚟講，選美似乎係入行嘅最好方法。坊間每年都有好多大大小小嘅選美，有啲巧立名目，用唔同形式搞啲比賽招募活動，最終都係鋪路吸納吓啲新血入行，睇吓有冇機會捧出個明日之星。
好似之前有一個(o靚)模「魔姐」，趁住熱潮走去出寫真，你知嗰陣大家為咗出位，身邊突然出現好多「知情人士」又或者「閨密」，個個都爭住爆嗰啲(o靚)模醜事，魔姐當然唔例外，醜聞接二連三咁湧晒出嚟，先係話佢整容，之後又話佢喺夜店做嘢兼生過仔，最後都出唔到位，仲好快消失喺人前。
搞着工作人員
除咗運動員有不死精神外，(o靚)模同樣係打不死，魔姐好快又捲土重來，走去參加另一個選美，本來大家都已經遺忘咗佢，直到最近因為一單是非，竟然勾起唔少人對魔姐當年參選時嘅慘痛經歷。原來當日魔姐嘅行徑，搞到啲工作人員個個都耍手兼擰頭，嗰陣時嘅佢知名度唔高，已經要求多多，嫌三嫌四，講嘢又自以為是，影相又要做啲古怪嘢博出位，最搞笑嘅係有一次喺綵排嗰陣，雖然大會準備晒啲嘢食，不過個個佳麗都唔敢食咁多，但係偏偏得佢一個例外，成日都話要食嘢，搞到啲工作人員勁頭痛！
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。