【馮仁昭四圍超】張繼聰讚索　邵美琪：做善事

【蘋果日報】張繼聰、周秀娜同邵美琪前晚喺尖沙嘴出席電影《女皇撞到正》嘅慰勞宴，張繼聰話今次好開心可以同邵美琪合作，佢話：「我細細個已經好鍾意佢，睇住佢嘅戲長大，佢係靚女天仙、好索，演技好嘅女演員。」之後問張繼聰覺得邵美琪靚啲定係老婆謝安琪靚啲，佢好大膽話今晚唔講老婆，老婆亦唔會反對！
張繼聰話《女皇撞到正》係以90年代做背景嘅驚慄喜劇，故事講珍惜眼前人，戲中有陰陽眼嘅周秀娜撞鬼，同俾鬼上身嘅張繼聰交流，張繼聰話：「上我身嘅有邵美琪、吳耀漢同葛民輝，我要扮演每個人講嘢，唔算好難，因為佢哋每個人有自己嘅特質。」
娜姐打醒精神
聽到張繼聰讚自己美若天仙，邵美琪就話：「咁講非常唔好意思，大家做善事箒，同阿聰合作好開心，佢好投入，又勤力又肯幫人，轉數快。」佢話平時演戲好緊張，今次做得好開心。娜姐亦都話同張繼聰、葛民輝合作好開心：「佢哋有不斷嘅創作，同佢哋一齊合作要打醒十二分精神。」至於票房，娜姐話唔擔心票房，希望有人鍾意齣戲，自己盡量做好自己演出。
撰文：馮仁昭