魚樂無窮：好波不如好運！

【蘋果日報】人有三衰六旺，股票又何嘗不是？舜宇光學（2382）上周公佈強差人意業績，中期盈利只增長2%，股價單日大裂口喪插24%；瑞聲（2018）噚日放榜，毛利率大跌之餘，純利更要倒退十多個巴仙，不過，股價竟然戲劇性急跌後倒升，唔講以為業績奇佳。
股價走勢南轅北轍全因兩個字︰市況。上周恒指跌穿27000點，走資洗倉無日無之，恐慌情緒充斥每個角落，業績差自然無命；相反，本周氣氛明顯轉好，資金由避險股中電（002）、領展（823）轉戰早前的熱炒股，玻璃都可以變鑽石，一周市況大逆轉，只能講句好波不如好運。
大自然家居（2083）月初發盈喜，預計中期純利大增，主要受惠核心地板產品銷售收入增加，以及木門及廚衣櫃表現持續改善，真材實料也！集團自5月開始密密回購，令股價逆市突圍。
有趣的是，進入blackout period後回購須叫停，但股價依然堅挺。點解買貨動力咁強？係咪因為A股同業兔寶寶4月入股成為第二大股東，然後惹來基金垂青？只能由時間驗證。股價昨日再度轉強，進取嘅可搭轉順風車，保守嘅不妨等埋月底業績再作打算，悉隨尊便。
唐牛
http://fb.com/tongcow88
本欄逢周二、四刊出