會師中環：大媽令天星價值消散

【蘋果日報】旺角殺街，令大媽們遷徙到尖沙咀，將原本和平的天星碼頭，變得吵吵鬧鬧，烏煙瘴氣。以經濟學的角度來看，呢批大媽其實正在製造負外部效應（Negative Externalities），即大媽未經同意下令他人利益受損，例如迫人聽啲難聽又嘈吵嘅歌聲。
天星碼頭之所以變得咁混亂，主要係因為該區域嘅使用權介定不清晰，並無列明嚴禁該類擾民表演，導致各表演人士須要私下解決土地使用嘅問題。講到私了，最文明嘅方法當然係用錢解決，例如畀錢趕走大媽。大媽唱歌為錢，相信無論係阿伯打賞，抑或其他人夾錢趕佢哋走，大媽們都十分歡迎。但呢個方法雖然實用，但道理卻講不通，因為這就猶如令一眾街頭表演者被大媽的歌聲勒索，繳付另類保護費。
畀錢行唔通，另一方法就係自訂規則，約束大媽們嘅行為。從早前報道可見，其他表演者曾希望與大媽輪流表演，梅花間竹一人二十分鐘，以解決場地使用問題。可惜大媽堅持獨霸場地，令其他人無癮回家。
而最後的競爭方法，就是早前出現的「驅趕大媽行動」。大媽的出現令場地競爭無日無之，使用成本增加，結果就是出現了所謂的「租值消散」（Rent Dissipation），令社會得益消失，可見「大媽唱歌」不只是嘈音問題，更是經濟問題，有必要盡快釐清場地使用規則以解決問題。
神仙丁
《審計搵丁》負責人
http://facebook.com/AuditSlave/
本欄逢周五刊出