【姐匙Talk】高人招搖公開嗒小三

【蘋果日報】全世界嘅男人同女人都一樣，女人愛包包，男人愛靚車。
大部份嘅女人，都認為車只係用嚟代步，而且買架車，一落地就跌價，又要定期維修、保養等等，真係值得買咁貴嘅車？但男士們嘅睇法就完全唔一樣，尤其係有財力嘅男人，買架車分分鐘貴過一個上車盤，坐住成層樓價錢嘅車喺條街行，唔止唔肉赤，仲不知幾咁威威豬，「高人」就一定係其中一人。
好多藝人都鍾意坐保母車，再請個司機載自己出出入入，但高人就好鍾意自己揸，加上佢身邊嘅朋友，個個都係愛車之人，最重要係個個都夠財力，靚車買完一架又一架。
開車窗任影唔嬲
當年高人仲未娶老婆，成日都會揸車載女伴四圍去，話說有一次佢揸車喺港島區出現，啱啱遇上傳媒採訪車，本來佢架車嘅玻璃好黑，就算認得佢架車，都唔係咁容易望到車上面嘅人，估唔到喺呢個時候，高人竟然主動打開玻璃窗，記者見到佢載住一位長髮女仔，重點係呢位女伴，並唔係佢當時嘅女友。
高人畀記者望完佢之後，再擺出一副飄飄然之中帶點傲慢嘅樣，直接啲去形容就係「你吹得我脹咩！」然後關上車窗，踩油絕塵而去。呢啲咪型囉……佢覺得！
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。