MyGut者言：港鐵管理層一家親

【蘋果日報】一句「我哋話畀你聽OK就得㗎啦」，馬時亨替港鐵（066）一夫當關──係「公關」個「關」。講寸嘴，開埠以來馬氏一門多傑，從碼頭咕喱到馬雲。可是，輿論只不滿「OK論」寸，卻不知「我哋論」更串──係「客串」個「串」。
這是港鐵的公司管治問題。馬時亨正職為港鐵非執行主席，負責「監察行政總裁及執行總監會其他成員的表現」、「確保董事局適時獲得與公司業務有關的充足訊息」、「領導董事局及提倡公開的文化」等。「OK論」首先不合公開文化，而港鐵請你做主席，你卻客串CEO解話，不但冇好好監察CEO「佢哋」管理層表現，亦冇早早確保「我哋」董事局獲得充足訊息。主席和CEO的職位本應相互獨立，佢OK我可以唔OK時才能提高管理層向董事局問責。「我哋論」話我哋佢哋不用分那麼細，良好公司管治淪為封建家庭統治，點得㗎？
女友Babe問我：「究竟肥佬黎勁啲定沙膽虹勁啲？」我支吾以對，佢再問：「我想知，其實係主席勁啲定CEO勁啲咁呀？」我反問：「咁你覺得馬時亨勁啲定梁國權勁啲？」她一臉天真：「邊個梁國權？」我出力形容：「講廣東話有啲似超級無敵估歌仔嗰個。」她恍然大悟：「咁梗係CEO搞笑啲。」我認真解釋：「其實CEO唔使識搞笑，亦唔使識講廣東話。CEO首要職責係領導管理層按董事局批准嘅業務計劃同預算執行日常公司業務運作。」她半信半疑：「馬斯克喺Tesla又CEO又chairman不知幾勁。」我嘆一口氣：「香港最勁係有玄學家問責，佢話土瓜灣流年犯太歲同廣東話嘅『瓜』有『瓜得』之意。」
徐家健　美國克林信大學經濟系副教授
http://fb.com/economics3.0/
本欄逢周三刊出