財經人物：第一代出市代表張天生80歲再轉工

【蘋果日報】做到80歲仍要繼續做，對不少人來說是一種痛苦，但對他來說卻是享受。工作年資已達60年，早已超越退休年齡的他，最近卻在其三份工作的履歷表上，再以80歲之齡加上新一份工作，他就是第一代出市代表張天生。
撰文：張活儀
攝影：何耀勤
今年12月將踏入朝枚之年的張天生，7月底正式離開工作22年的星展唯高達，在8月1日正式加入由舊同事許照中任主席的六福金融，繼續其經紀生涯。談到不退不休，張天生接受訪問時講出原因，「做緊嘢，唔想退休㗎，退休日日在屋企無所事事，真係悶死多過病死。」
對於離開星展唯高達，「最近星展唯高達改銀行制度，咁我覺得自己80歲，銀行又點會請你80歲人做嘢？」張天生如是說。雖然舊舖光大新鴻基適逢明年50周年，都有意邀張天生回巢，但張天生有感光大新鴻基規模大，未必適合自己，最後都決定婉拒。
老闆：唔會畀壓力佢
「好僥幸，有呢間公司（六福），許生（許照中）又係老友」，張天生引述許照中說：『你過嚟啦，生哥，大家老友鬼鬼有乜所謂吖。』如是者，張天生工作22年後再一次跳槽。老闆許照中亦都說：「我識咗生哥好多年，佢又德高望重，行內個個都識佢，我公司又發展緊，難得佢肯嚟，你都知我哋現時發展緊業務，又有個咁有民望嘅前輩嚟幫我手我當然歡迎。」
許又承諾不會予張天生壓力，他說：「佢現時咁嘅時候，根本都唔係搏殺期，一個養尊處優嘅時間，冇太大壓力。」又說：「佢係我前輩，我點敢畀佢咁大壓力，佢嚟到呢度我梗係唔會畀太大壓力佢啦，佢鍾意點就點。」
張天生認為，過得安樂才是他所追求，「總言之我日日有錢使就得啦……我儲備夠用到100歲。」又說：「我香港層樓40幾萬買返嚟，現時都升成十倍，澳洲間屋8萬澳紙買返嚟，現時值60萬澳紙，唔賣喇，留畀兩個孫。」
至於仔女，他說：「我曾經問大仔，你要唔要錢，我有好多港紙響度，大仔話唔要，問個女又唔要，咁咪畀最細個仔。」又說「但佢多都唔要，佢話我供埋間屋就夠，咁我咪畀咗10萬澳紙佢供埋間屋囉，最緊要安樂。」
記性好　無諗過退休
80歲之齡最重要仍是身體，對於養生之道，第一要均衡飲食，平時吃得清淡，多吃菜、魚；其次是運動，張天生每朝會用半小時游泳，晚飯後亦會行一小時；他更有一個秘訣，「我星期六日會唱歌，由一點唱到三點。」
何時才會退下來？「我完全冇諗，除非自己隻手痹咗拎唔起電話，咁就退休，現時我仲記性好。」又說：「我仲未諗好退休，從來都無諗過。」
當你認為80歲是終結，對他來說卻是新開始。