【姐匙Talk】少爺仔爛蒲保鑣傍實

【蘋果日報】成功靠父幹，好多城中富二代、富三代讀完大學就返屋企幫手，當然係空降做高層，仲安排公司老臣子睇住。好似「少爺仔」咁，畢業後返去幫老竇手，一入職就做高層，加上佢係屋企長子，所以外界都認定佢係接班人。
30出頭嘅少爺仔，工作表現就唔多清楚，不過佢最大嗜好就係去夜蒲湊熱鬧，試過好幾次去派對玩得興起，同人嘈交，去到夜場成個小霸王咁，冇人夠膽得罪佢。少爺仔愛夜蒲，玩得夜就第二日唔返工，就算阿爸都冇佢符。
飲大幾杯起爭執
少爺仔最鍾意去中環夜場，又愛媾外籍model，有時俾人影到一拖幾，到周末就同佢哋去開船P，總之就享受玩樂。前幾年見佢有個拍得穩定嘅外籍model女友，雖然父母唔係想新抱係外國人，不過見佢修心養性過一陣，都慢慢接受，點知到最後都係分手收場，少爺仔又過番佢嘅夜蒲生活。
少爺仔喺中環夜店嘅江湖地位，蒲開都大概知道。不過最近有一次佢哋飲大幾杯起爭執，混亂中仲有人受傷，搞到少爺仔成家都好擔心，勸佢戒蒲，又安排保鑣跟住出入，等家人可以安心，少爺仔依家出入都有人保護，連去clubbing都係。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。