海外單車遊多踩出馬路

【蘋果日報】單車旅遊越來越盛行，不少旅行團力谷海外單車遊，首選台灣、日本等地。有單車教練稱旅行社單車遊由5天、7天至10日團不等，提醒港人到海外騎單車需注意個人技術及體能、單車性能如煞車系統以及路線，「係咪要踩山路、踩馬路，每日要踩幾多公里等」，出發前需充份準備。
行車線或與港相反
海外單車團領隊、香港單車隊前成員梁志賢稱，港人到海外騎單車，除要有騎單車經驗，也需有一定技術及足夠體能，「一般單車遊閒閒哋每日要踩50公里，要喺香港鍛煉體能」。
他又稱，海外騎單車也需留意路線及單車煞車系統，「喺海外踩單車唔係踩單車徑，會出馬路踩，部份地方行車線同香港相反都要特別留意」。自攜單車較安全，「自己車容易啲控制。如果租當地單車，頭一、兩日要適應同熟習架單車」。
梁指不少港人會到台灣、日本、東南亞甚至歐洲騎單車，「一般5天、7日或10日或以上，環台一般要11日，費用由1萬至3萬元不等」。他稱，各旅行社或保險公司的旅遊保險保障範圍不同，「買（旅遊保）要特別留意，究竟包唔包高危單車活動，好似喺馬路踩或者郊區踩，要問清楚旅行社或保險公司，睇吓內容包啲咩」。
■記者譚靜雯