《銀魂》三型男約埋剃毛岡田將生割傷菅田將暉

【蘋果日報】真人版電影《銀魂》去年創下票房佳績，導演福田雄率領原班人馬添食拍續集，今次仲加入一班新角色，陣容包括三浦春馬、堤真一等，《銀魂2》安排下月17日在日本上映。
《銀魂2》中繼續由小栗旬飾演主角銀時，佢同扮演新八嘅菅田將暉表現合拍，而且感情亦相當好，二人近日就上節目公開拍攝趣事。小栗旬同有份演出嘅岡田將生不嬲都係圈中好友，原來佢哋同菅田將暉要扮陪酒女，所以小栗旬想剃腋毛，經問完岡田將生、菅田將暉意見後，三人決定用剃刀互相幫忙。當三位型男赤膊剃毛期間，小栗旬好細心咁為岡田將生剃完海膽，輪到岡田將生幫菅田將暉，點知卻一時失手，菅田將暉被剃刀弄至出血，岡田將生見狀即話：「對不起、對不起！因為我是第一次。」小栗、菅田重提呢件事都忍唔住失笑。