動漫人物：出Figure圓夢港男靠街霸創業響朵

【蘋果日報】一年一度的動漫節，可以說是各大玩具廠必爭之地，新產品傾巢而出，鬥精美、鬥細緻、鬥逼真，務求完美重現原著作品角色，吸引粉絲「課金」。走遍展場，最能令人留下深刻印象的，包括肌肉橫生、三角肌比腿粗的街霸figure，本地玩具廠BigBoysToys的阿寬，正是它們的設計師。
記者：佘錦洪
本身從事手機遊戲美術工作的阿寬，4年前認識現在的拍檔，「開頭知道到佢話想做玩具，仲話要做街霸，一聽就好中」，皆因小時候經常流連兒童機舖打街頭霸王，「俾人屈機多，次次都死，打得唔叻但好鍾意啲人物」，於是兩人膽粗粗走出安全區，齊齊辭職創業，實現童年心願，全職投身玩具設計生產。
今年推出原創瑞獸
阿寬精於平面繪圖，曾秘撈為美漫做代工，不過講到設計玩具卻是兩眼一黑，「主要係唔識畫3D，要搵原型師做雕刻，畫晒四面圖畀佢」，幾經波折拿到灰模原型後，原來要與生產廠房研究拆件、開模、上色等程序。他指小公司人手不多，最忙時一個月要往返香港及東莞廠房8次，花上大半年時間做QC才「見得吓人」，遠比想像中困難。
憑着「beginner's luck」加持，第一隻生產的街霸阿隆發光發聲擺設一面世即獲得好評，成功打響名堂，「講得衰啲我哋靠街霸吸引咗好多唔同類別、好多唔同國家嘅fans返嚟」。
不過阿寬明白，要在競爭激烈的玩具界立足，必須要有自己特色，「街霸嘅玩具其實出過無數㗎啦，要靚要細緻乜都有」，於是去年大膽嘗試推出Bulkyz系列，簡化人物五官，加粗手臂肌肉，硬着頭皮向遊戲原廠申請許可，「佢哋竟然又批咗，我哋梗係唔會咁儍走去問點解啦，可能因為完全同佢原著唔似，所以佢冇得抽秤你」。想不到成品首度在動漫節面世即獲追捧，「最意外嘅係好多女仔都話好得意，叫個男朋友買」。
今年動漫節，BigBoysToys除推出Bulkyz系列新產品外，亦首度在港公開原創設計「瑞獸勇者」，「呢隻用舞獅做概念，以前細個跟阿爸同世叔伯去拳館打牌，四圍掛晒啲獅頭，有個開心喜慶感覺喺度，自己好鍾意」，並為它構思了一個未來世界的背景，「本來想畫埋漫畫，但真係冇時間」。
阿寬指出，動漫節等展覽對他們相當重要，因為單靠網上宣傳力度不足，「人流多啲，客路廣啲，有啲產品可能3年前已經擺咗上網，但佢哋係嚟到展覽先見到」，更可藉此認識海外夥伴，衝出香港到北京、上海、泰國參加展覽，「依家我哋有online shop，有時寄啲地址真係聽都冇聽過」。但令他最高興的，還是可以直接見到支持者，「未必真係買嘢，但係佢會嚟同你影張相，之前買過嘅特登攞返入嚟會場畀我簽名」。
創業至今，阿寬指現時生意總算叫做持平，「賺錢梗係想啦，但做到自己鍾意嘅嘢，賺錢其實係一個bonus」。