【科技●國際專欄】機場Care-E機械人　帶路搬行李仲識氹人

【蘋果日報】香港國際機場第三條跑道興建在即，跑道多咗，即係機場又大咗，去到機場蕩失路嘅機會都大咗，請各界路痴作好心理準備提早check in。
撰文：劉小黃
但你估只有香港機場先咁大咩？美國嘅機場一樣大到嚇死人，唔識路真係隨時又要大鬧機場。唔使怕！科技能夠解決一切，美國甘迺迪國際機場同三藩市國際機場，今年將會引入多部搭載人工智能的機械人，唔係維持治安，而係充當「機場導遊」，帶領巿民遊客順利登機兼幫手拎行李。
這部由荷蘭皇家航空開發的機械人「Care-E」，雖然個名明抄迪士尼的「Wall-E」，但Care-E唔係執垃圾機械人而係「執遊客機械人」，它會主動接近已通過海關檢查準備前往登機的遊客，只要出示登機證讓Care-E scan一下，它便會帶領大家出發走到候機室，等大家唔會走錯閘口登錯機。外形有點似巨型尿壺的Care-E，藍色車身看似幾可愛，內置GPS及8個超音波測距器，能準確迴避任何障礙物前進，但要作為「機械人」當然能夠與人溝通，其面板載有一個4K LCD熒幕，唔係用嚟播廣告而係Care-E對「眼仔」，能根據與遊客的交談內容作出不同的眼部表情，喜怒哀樂、單眼眨眼都識。不過呢啲都係氹細路的功能，Care-E另一個重要機能就係搬行李，其車身能夠運載最重39kg的貨物，大約兩件手提行李左右，並以時速約4.8公里前進，可以想像好大機會變成BB車⋯⋯Care-E的人工智能還懂得辨認使用者身份，若你人有三急上機前要去廁所，Care-E還懂得在洗手間外守候「主人」，但似乎不能防止別人拿走你的行李⋯⋯還是加兩支槍將它改造成鐵甲威龍吧。