【動漫節】玩具難過「老婆關」九叔大爆「走私」秘技

【蘋果日報】男人的浪漫，又豈止豆腐火腩飯？三個「LEGO入血」的男人，曾聞「LEGO界九叔」妻子因為大怒而將心愛LEGO扔出窗外，而「九叔」從此銷聲匿跡，故為了暪著愛妻，「走私」LEGO入屋時更要各出奇謀，「如果俾佢見到你拎住一箱二箱，就好麻煩架啦。一定要靜靜雞」。多年來的珍藏越買越多，「屋企包唔住火」，惟有私藏LEGO到貨倉和辦公室。
化名阿強、阿豪及阿九是LEGO的忠實fans，平均每月至少花費數千購買LEGO，特別版及限量版的LEGO更會多買一、兩盒，「一盒砌、一盒擺」，直言「已經節制咗好多」。最高峰時試過月花五萬購買LEGO的阿九說，現時家中已放有過百萬件LEGO零件，LEGO公仔更擺滿整個房間，因空間問題，太太已不支持他玩LEGO，「一拎返屋企，就會好有臉色，甚至會罵」。
不過要「走私」LEGO，阿九亦有方法，大盒的LEGO會叫玩具店給予LEGO專用的黃色大紙箱包好，「將一個黃色箱放喺一大堆黃色箱度，唔會咁覺眼，咁樣就易收藏」，又或者先將LEGO放在門外，確認客廳無人才靜悄悄地將LEGO收入房，「如果俾佢見到你拎住一箱二箱，就好麻煩架啦。一定要靜靜雞，有時LEGO有啲撞擊聲，咁就會穿崩，所以要好有技巧放喺暗角」。
他又說，試過在情人節帶太太到LEGO專門店，「之後話不如你買呢副（LEGO）俾我做禮物，去到嗰個moment，佢say no都唔得啦。生日佢都可能會送，不過依家唔會架啦，費事好似鼓勵我做呢樣嘢咁」。
自小已玩LEGO的阿強則說，購買心頭好後，「會同太太講呢盒係人哋嘅，但其實係自己嘅」，而大盒的LEGO則會放到貨倉及辦公室。他說，最常以「同朋友食糖水」為理由出去買LEGO，「交收埋（LEGO），又食糖水，好開心」。而將LEGO收在衣櫃的阿豪則會趁太太上班時偷運LEGO入屋，為免太太不滿，惟有承諾以後會更節制。
三人不時因LEGO開罪太太，但三人仍異口同聲地表明愛太太多過愛LEGO，笑言在「LEGO與老婆同時跌落水」的偽命題裡，一定會先救太太，「LEGO跌落水撈返起都應該okay」。