經濟客飯：藉名人吸客的食店

【蘋果日報】早排去一間茶餐廳食早餐，見店內貼滿同一篇雜誌報道。報道焦點是某歌星豎起手指公，大讚茶餐廳晚市的小菜好食。八掛問問伙計晚市收幾點，答案是晚市其實冇做好耐，報道內容已經毫無意義，只求歌星個樣有宣傳效果而已……
有大堆名人寫序的書不一定好看，貼滿名人照片的餐廳不一定好食。有些餐廳貼滿名人合照純粹因為地點，是偏僻又好是風景靚又好，又或特別多人在附近拍戲，跟食物質素未必有關係。但你會話唔係喎，明星識飲識食，食評人更加唔使講，餐廳多名人幫襯點都反映到食物質素吧？
之但係名人是名人，你是你，不要存有幻想。名人行入餐廳的待遇，廚師煮食的心機，以至菜式食材本身，都不是你和我這些普通人可以得到的（如果食物本身變化不大，較標準化，中伏機會會低一點）。越出名越多人認得的食評家寫食評，也許是上佳文學作品，但不會是可靠飲食指南。「米芝蓮」有影響力，皆因評分的都是神秘人隱藏身份，待遇就如一般顧客，評價就有參考價值得多。
當我見到餐廳食店貼名人照片貼得太誇張，尤其是相中的「影視紅星」是誰我都不太肯定的時候，我總是帶點偏見和顧忌，就如我懷疑銜頭印得密密麻麻的名片一樣。
曾國平
美國維珍尼亞理工大學經濟系副教授
http://fb.com/economics3.0/
本欄逢周五刊出