【一周必看】大劉鬧爆手機女　甘比都㩒唔住

【蘋果日報】人稱「大劉」嘅華人置業老闆劉鑾雄出名好火，即使就快67歲，鬧起人上嚟依舊中氣十足，佢老人家日前就喺銅鑼灣希慎廣場，因事同一位路過少女發生爭執，引嚟途人圍觀。
讀者傅先生喺當日下晝5點左右，由希慎廣場啟超道入口準備行入商場，離遠就見到大劉喺七人車步出，連埋保鑣一行數人，浩浩蕩蕩咁行入去，當傅先生搭扶手電梯上1樓，已經聽到有人嘈交，但就唔知係邊個，到步上往2樓嘅扶手電梯時，終於聽得出把聲係來自大劉，佢老人家竟然一路鬧到上2樓，當時佢身邊多咗老婆甘比，同相信係佢一對仔女秀樺同仲學，當大劉打算轉身走時，被罵嘅短裙少女還拖︰「你唔敢呀？」仲叫佢「積福」，呢一句就辣慶咗大劉，「積你個福！積你老母！佢（子女）受傷係咪你賠呀？」少女辯稱︰「我睇緊㗎！」大劉再爆一句︰「你掛住睇你嘅（手）機呀！」