投資新股規條：唔過12點

【蘋果日報】「呢幾年啲新股，我同自己定咗條線：唔過12點，最長3日。」 Henry說，「唔過12點」，意思是大部份新股，在上市當日的中午十二點前，必定沽走。「最長3日」，因為三日後股價已反映另一個故事，故新股普遍不能揸超過三日。
須睇獨特及未來概念
近年Henry炒新股大有斬獲，每隻賺十數萬至百萬不等。他認為投資新股有四大規條，「第一獨特概念，此類股票係市場未有同類，如閱文（772）。獨特概念係基金必要買嘅，因為新股有回撥機制，理論上散戶可以拿到百分之五十，基金唔夠貨便要第一日在市場掃。」
「第二，都係講概念，未來概念。投資股票係投資未來，如果間公司勾畫到一個好動聽的故事，令投資者有一個好美麗的願景，咁就唔好理佢假定真，唔怕做。最近最啱聽係希瑪（3309），呢間眼科醫院願景在大陸，上海、北京開連鎖店，準備打入一個十三億人口市場。真係一個令投資者充滿幻想嘅故事，但願佢成真啦！」
「第三，如果行業係市場熱炒、需求大，又受惠政策，同市民生活相關的概念股，如醫藥、新科技、新經濟、教育，不怕做！」
「第四，公司知名度夠大，逢人都識，尤其行業龍頭公司。當新股潮來臨時只要『掹車邊』的公司都可以做，到時係由資金推動股價，大把炒家入場。」
「我一定新股上市當日12點前散，因為通常朝早搞完，中午要出去飲杯茶，唔想因為股價波幅影響心情。最後，如果新股價格穩定尤其有新資金不斷吸納，可以睇三日。」但三日後都是沽貨多，因為「近年新股的質素慘不忍睹，往往第一日當炒，之後虎頭蛇尾。」