李柱銘：國家憲法非《基本法》一部份

【蘋果日報】【反駁王振民】
【蘋果日報】中聯辦法律部部長王振民日前指《基本法》除修改或取代的部份外，國家憲法全部內容均適用於香港。前《基本法》草委李柱銘指當日起草《基本法》時，從未提過國家憲法是其中一部份，又指人大常委就一地兩檢決定有否違憲，應由法庭裁決，而非人大常委聲稱有關決定沒有違憲，法官就要跟從，否則「法庭審判權咪都畀你攞埋，唔可能㗎嘛！」擔心此例一開，即使港府通過違憲法律，只要人大再作一個決定，香港法院將無從審判。
李柱銘昨日在電台錄影節目中直言，起草《基本法》期間「完全冇提憲法係《基本法》一部份」，認為人大為一地兩檢所作決定是否違憲，應由法庭聽取雙方陳詞後作裁決，而非由人大常委說了算，「即係人大常委為法官解決問題，你唔使審案啦，係合情合理，合乎《基本法》，法庭嘅任務係咩呢，冇得判啦喎，就跟㗎啦喎」。
指審判權應歸法院
他反問，若人大常委說決定沒有違憲，「法官就要跟啊？法庭審判權咪都畀你攞埋，唔可能㗎嘛！」他強調，《基本法》寫明特區享有司法權，審判權歸於法院，質疑人大堅持為一地兩檢所作決定無違憲，「將來點審案？法院要嚟做乜？」
自由黨創黨主席李鵬飛指，中央2014年首次提及對港全面管治權，「好似港人治港有問題啦」，但中英談判時北京只提港人治港、高度自治以及一國兩制，直言若當時提出全面管治權，必令港人驚訝，「嗰陣時唔講，依家先嚟講，所以我覺得高度自治事實上係受到好大挑戰」。
立會前主席曾鈺成亦指，中央有官員提出立會非至高無上，故不能通過與《基本法》有牴觸的法例，「同樣道理，人大都唔係至高無上，因有中國憲法，而憲法生咗《基本法》出嚟，《基本法》裏面講咗中國政府對港基本政策方針唔改得」，指人大常委會決定能否與中央對港基本政策方針有牴觸的情況，存在疑問。
■記者梁穎妍