【科技‧國際專欄】懶人福音　瞓喺度打機神器登場

【蘋果日報】人類天生就是懶惰的動物，上帝（別名Steve Jobs）於是發明了智能電話，讓天下懶民一機在手便能處理天下事，不過懶惰是沒有盡頭的，例如打遊戲機，你要我每次都要起身擔凳坐好開芒轉台先打到機，我的生命已不能再承受這麼複雜的事，有沒有方法我瞓喺度唔郁都可以打到PS4同埋Switch？Why not？
撰文：劉小黃
日本gadget製造商Thanko，好似多啦A夢咁專門為大雄提供懶人神器，之前已出過「浸浴專用吹氣手機支架」同「打側身瞓住玩手機專用咕(o臣)」，令一眾經常想瞓喺度唔郁嘅懶民趨之若鶩，最近佢哋推出最新懶人神器「Eye Theater」，外形類似VR裝置但其實並沒有VR功能亦玩唔到VR game，取而代之就是內置對應1080p輸入、解像度1280 x800的熒幕，能做到120吋大銀幕效果，其主要功能，當然要用來打機！
雖然任天堂Switch可以當手提遊戲機使用，但熒幕始終偏細而且重量也不輕，如果要瞓喺床長時間使用還是有點不便，這時候Eye Theater便幫到你，因為它附送對應任天堂Switch的Type-C轉換插，可以將Switch的畫面輸出轉到眼鏡熒幕，從此以後大家就可以瞓喺床度打Mario無煩惱，更有不少人想起任天堂曾推出的VR遊戲機Virtual Boy，好想Eye Theater推出紅色版本......
一度成為科技界焦點的VR眼鏡，熱情似乎已經冷卻，一來配置比想像中麻煩，左插右插幾十條線都未玩到，二來始終沒有大熱的VR遊戲登場，眼鏡到頭來只是當私家大熒幕使用，Eye Theater對應HDMI輸入所以可以用來打PS4等其他遊戲機，當然，這副眼鏡另一個最有價值之處，就是可以讓大家瞓喺度睇戲，有咩戲瞓喺度睇最好？你懂的。