【科技●國際專欄】facebook申請恐怖專利睇晒私隱冇得避

【蘋果日報】對於做創科的人來說，美國專利商標局（United States Patent and Trademark Office，簡稱PTO或USPTO）是個有趣的寶藏，在那裡可窺探未來，可以查詢各大公司登記的不同專利，因為所有街坊都睇得，所以各媒體都會睇實，為大家披露下一部iPhone或未來的Tesla可能有甚麼功能，而一些犀利的中國科創人亦會睇到實，以便可以在美國公司來朝之前率先在國內申請有關專利，到時New Balance變新百倫，呢啲咪中國的實力囉。
撰文︰盤古目
從專利中不單可以探索有關公司的發展方向，亦可見到有關公司的品格，以下有三個由同一公司申請的專利：
根據你跟不同用家的互動作出評分，以評估用家之間的關係。互動的評估包括你多唔多睇對方的post，有冇合照，對話、留言次數，是否經常在同一地點出現。即是就算你作自己係單身，有關專利係可以測到你其實想溝邊個，或同邊個有路。（專利號：US20150356180A1）
用家用裝置甲收看、收聽媒體資訊時，另一部連接社交網絡的裝置乙會以數碼指模、特別聲頻、數碼水印等方式同裝置甲互相確認，以便在裝置乙上收集環境資料（聲音），以紀錄你收看媒體時的反應資料。呢個專利就係睇你對邊個節目邊個廣告有反應，所謂裝置乙可以是smartphone或smart speaker之類，收料後就知你的喜好，或節目受歡迎程度。（專利號：US20170195435A1）
根據你以往發佈的動態，或留言對話，來計算預測你未來會發生的人生大事，包括拍拖、結婚、生仔、分手、轉工，甚至死。專利提到，因為等你更新動態時至派針對性廣告可能已經太遲，所以此專利就要等大事未發生前預測，一早派有關廣告俾你。我舉個例，見你啲post就死就死咁，一於派定啲殯儀服務廣告過你。（專利號：US20120016817A1）
其實唔講大家都估到呢啲專利係邊間公司申請，咪係Facebook囉。當中專利2一見光就引起竊聽關注，Facebook發言人話專利係申請來以防他人濫用，真係睇住先，年頭話唔會收加密幣廣告，而家咪又改口。
大概甚麼樣的老細就有甚麼樣的公司，Facebook創辦人朱克伯格雖已是全球首富頭十位，但其公司越來越冇品，好好的社會網絡理念淪為濫索用家私隱的榨汁機。