變相益劏房業主

【蘋果日報】兩電加價令低收入住戶生活百上加斤，政府每月每戶50元電費補貼，亦無助紓緩沒有獨立電錶的劏房戶。爭取低收入家庭保障聯席組織幹事李風清認為，加電費會加劇劏房業主濫收電費情況，補貼只變相益業主；中產人士亦認為每月補貼100元以上才有幫助。中電回應指，明年起為有經濟困難劏房戶提供500元資助，預計每年約10,000個劏房戶受惠。
李批評3,000元補貼無助無獨立電錶的劏房戶，指兩電加價將對劏房戶構成沉重壓力，「夏天好熱，劏房冇窗，佢哋想開冷氣都要慳住慳住，臨瞓前開一、兩個鐘就熄」，認為加電費只會加劇劏房業主濫收電費，「收幾多電費業主話事，濫收情況不斷發生，依家再畀藉口業主加電費」。
中產：補貼每月應$100以上
住在土瓜灣唐樓的租戶張小姐形容，再加電費令生活百上加斤：「已經好慘啦，唔好再加啦，再加就冧啦。」她指現時月租9,000多元，夏天又要開冷氣，要支付約600元電費，壓力沉重。
中產之聲主席李子榮認為今次再加電費，對中產住戶來說都「有啲壓力」：「特別係港燈，加得有啲多。」他認為政府補貼不足：「一個家庭最少都要每月畀500蚊電費，即係得十分一，係杯水車薪。」他指如果政府想顯示誠意，至少要將補貼加至每月100元以上。
中電回應指將設立中電社區節能基金，首年將動用7,000萬元，推行社區環保節能計劃、資助工商客戶更換設備，同時支援弱勢社群，包括資助劏房業主安裝獨立電錶，並為經濟困難劏房戶提供500元資助，每年約10,000個劏房戶受惠，申請詳情今年第四季公佈。
■記者陳芷昕