WhatsApp成呈堂證供

【蘋果日報】鷹君羅家現分裂成兩陣營，一邊要求匯豐信託將資產歸還予母親手上；另一邊深信羅嘉瑞為正人君子，財產取之有道。兩陣對壘期間，69歲的三家姐羅慧琦中途變節，轉投羅嘉瑞一方，箇中原因，羅啟瑞亦無從稽考，「除非佢見到我哋癲嘅，衰嘅，有咩陰謀，我自己就見唔到喇，我3月都講過話唔會要多一分一毫。」
原來三姐變節之前，沒有留低一句說話，「如果有傾，有勸嘅乜乜乜，我覺得仲可能有第二啲原因，就係突然間無影無蹤，係突然間無影無蹤，仲要彈出菲傭變節事件，嘩，太誇張喇。」今年1月時羅老太近身菲傭May姐突然辭職，後成匯豐證人，並持有錄音證據。
最令羅啟瑞氣炸的，是幾位同氣連枝的兄姊組成的WhatsApp群組，對話內容竟然變成呈堂證供，而提供這些資料的正是羅慧琦，「佢啲WhatsApp拎晒出嚟（呈堂）啦，仲要冇講我哋知添，呢個仲誇張過個菲傭。」該段WhatsApp內容中，羅啟瑞提出要增持鷹君股份以令信託取回控制權，遭匯豐律師質疑羅老太的增持指令是由羅啟瑞提出。
大哥羅孔瑞同是變節者，轉投羅嘉瑞一方，惟多月以來未曾露面，「佢冇出場就唔講佢喇，都係覺得錢嘅魔力比較大，我冇內情。」本報曾透過羅嘉瑞一方發言人，嘗試找羅慧琦及羅孔瑞，就羅啟瑞指控作回應，但截稿前未獲回覆。