【馮仁昭四圍超】怕社會壓力何韻詩復出：企後少少

【蘋果日報】何韻詩曾幾何時與「黃絲」、「社運」劃上等號，然而抗爭過後，何韻詩亦退下火線，回歸歌手身份，仲計劃年尾推出唱片，希望做多啲歌，做十首或者更多。靜待近兩年，何韻詩再次推出新曲《極夜後》，日前佢喺觀塘接受訪問時話：「年半前開完紅館，喺創作同音樂上搵唔到最適合嘅狀態。我覺得創作係好直接同真，但歌手同社會環境，令我有壓力，好似要呼應社會上嘅嘢咁，令創作變得唔真實，既然搵唔到平衡，我決定不如停一停。」
過去兩年，何韻詩話用唔同身份喺幕後做嘢，但唔想公開講。問佢係咪怕身份影響到件事？佢點頭承認話：「都係，我想企後少少，件事未完成晒。都企咗喺前面咁耐，唔使做乜都揮晒大旗嘅，喺角色上唔同咗。」
放開自己
問何韻詩會唔會視今次為「重生」，佢就話只係想返去初入行嘅狀態，又話以前好驚核突、好多顧慮，依家放開咗自己，試多啲唔同嘅嘢。
撰文：馮仁昭