逸峯35%住戶壞冷氣機　熱天受困擾 「唔凍滴水結霜」

【蘋果日報】【周末專題】大熱天時無冷氣，業主谷到一肚氣。恒地（012）粉嶺逸峯入伙約3年半，不少住戶慘受冷氣機困擾。35%住戶入伙以來，伊萊克斯牌子的冷氣機都有大小不同的問題，包括唔凍、滴水、有異味，麥小姐一屋4部冷氣機，整足3年沒完沒了，另直擊一個兩房單位，冷氣開了等於無開，更失驚無神會結霜。
記者：陳家雄
攝影：晉平安
恒地回應指保養期已過，業主可向管業處查詢或直接聯絡冷氣機供應商。另一名業主趙先生不滿恒地的答覆，認為發展商「賴貓！」
粉嶺逸峯業主麥小姐於2015年初收樓，第一年夏天就發覺冷氣機出現問題，「全屋4部冷氣機，各有各問題，廳嗰部唔涼，兩個仔間房嗰部一開機就有陣噏味，主人房嗰部一開就沙沙聲。」發展商派冷氣機師傅檢查及維修，懷疑漏雪種，整完當年暑假才有冷氣用。
「年年整完都有問題」
沒料到翌年冷氣機又出現問題，「唔涼，直情吹暖風出嚟，校到18℃都唔係好涼，跟住又搵管理處，整到去年，年年都整，但整完都有問題。今年到主人房冷氣機滴水，同老公講，算啦，唔得就換咗佢。但老公話，買層樓幾百萬，無理由用一、兩年就嘥幾萬蚊去換。」
後來認識同舟人，她稱：「睇埋屋苑facebook，原來有啲業主都係咁，有朋友冷氣甚至結冰，我都算好彩，有啲直情用唔到，好多業主求助無門。」她不滿道：「一部冷氣機無理由三年就換，梗係離譜啦！唔離譜都唔會出聲。想畀人知道，恒基管理、服務係唔得。」
屋苑去年10月份進行問卷調查，向全屋苑728住戶發出問卷，當中254戶承認單位冷氣機曾經或現時正出現問題，主要問題為滴水、製冷不良。有109戶表示發展商提供的保養期內曾維修及檢查冷氣機，反映冷氣機在入伙初期已出現問題。由2016年1月至2018年6月，屋苑近乎月月搭棚維修冷氣機。
記者到訪一個兩房單位，當時中午約30℃，客飯廳開了兩部風扇，冷氣機有風吹出卻不涼。業主感嘆：「住咗3年幾，呢部冷氣機整過好多次，先係唔涼，跟住滴水，後嚟發現去水喉裝錯。主人房冷氣機更離譜，原本附送嘅遙控器唔掂，換另一個，但透過遙控器關機，熄一熄，機身竟然結霜。」
恒地稱保養期已過
恒地發言人回覆指屋苑自2014年年底入伙，至今逾三年半，隨樓附送之家庭電器所提供的一年保養期亦早已屆滿，惟其後有個別業主要求跟進冷氣機事宜，客戶服務組亦有盡力提供協助。如業主有需要檢查或維修冷氣，可向屋苑管業處查詢，或直接聯絡冷氣機供應商。
業主趙先生指出，目前街坊檢查及維修冷氣機均自掏荷包，除了每次數百至逾千元不等，若需要搭棚，須再支付二千多元。「產品有問題，應該供應商派人免費維修。呢個唔係保養期過後嘅問題，一開始成批貨根本有問題，唔係我哋業主打橫嚟講。」對於恒地的回應，他怒斥：「賴貓！拍吓籮柚就算數！」本周日逾70戶業主舉行特別大會，要求發展商跟進冷氣機有問題事宜。