演而優則唱李聖經新劇清唱晒歌喉獲讚

【蘋果日報】由李聖經及李尚允主演嘅tvN劇集《想暫停的瞬間：About Time》於上月21日首播，同時正於Viu煲劇App熱播。劇中李聖經飾演音樂劇演員，擁有見到所有人餘下壽命嘅能力，佢跟李尚允飾演嘅集團理事長更上演一段奇幻愛情。
模特兒出身嘅李聖經，近年轉戰演藝界，先後拍攝多套人氣韓劇，今次更於《想暫停的瞬間：About Time》中首次挑戰音樂劇演員一角，為劇迷帶來驚喜，而李聖經更於劇中大展歌喉，令觀眾眼前一亮，發現原來佢都係唱得之人。於最近一集中，李聖經就一邊吸塵一邊清唱，獲網民大讚其唱功不遜歌手。
事實上，李聖經之前已多次展示唱歌實力，曾於綜藝節目《蒙面歌王》中演唱《嘮叨》及《現在這樣就好》，當佢揭開面罩一刻，全場觀眾亦大感驚喜。之後李聖經曾於頒獎禮中演唱《Finally》及《Love on Top》，又曾跟男歌手Eddy Kim合唱《我的唇像咖啡般溫暖》。連「馬舞大叔」PSY去年推出專輯《4X2=8》，亦邀請李聖經合唱《The Last Scene》，肯定李聖經嘅唱功。
今次李聖經於《想暫停的瞬間：About Time》中挑戰音樂劇演員一角，可以話係毫無難度，其獨特唱腔令觀眾對佢嘅歌藝更加「入腦」，李聖經要隨時搶攻樂壇亦都唔係無可能。