【一周必看】刁鑽密碼唔難記　教你幾招反挑黑客機

【蘋果日報】最強密碼反挑黑客
雖然好多人都會諗，冇用㗎，你個密碼幾強都好，要攞你就會攞你，呢代人類對勢力強權的無力感也太可憐，但不代表我們要感冒菌入腦下垂，得過且過。包括作密碼，唔好輕易放棄，一定要諗個刁鑽的耍黑客匪徒。當然，自己要有邏輯理念記得密碼刁咗乜鑽咗乜。
撰文︰盤古目
登入分身
首先，要為不同種類戶口分組，如銀行理財固然最重要，私人或公事最好分開，登記時用不同電郵登記，經已是防黑第一步。最基本，一個朋友私人專用電郵，一個公事電郵，再衍生下去可以更多電郵身份：有理財用，內地對口用，網絡身份用，攞優惠著數用等等。大家登記新戶口時，亦不妨善用你的名字，在名字欄加埋相關網站名，如小姓「陳」，名叫「大文支X寶」，之後收到垃圾電郵時便有機會知道邊間公司出賣你。
自創密碼邏輯組合
大小寫英文加數字加標點經已是入門要求，不贅。
第一招自創生字，如果密碼個字一查字典就有，黑客Robot撞你頭兩個字母就有整成串密碼，所以密碼最好自創文字，其實以前讀書測驗時大家都周不時亂填字母，apple變elppa，password變pezzwarb，soccer變tpddfs；再進一步變化是縮寫，如密碼源自長句：Do you hear the people sing?，則密碼可取每字首字母變成Dyhtps!1789，香港人勝在可以玩埋中文拼音，但相信Dllm689經已是常見密碼之一。
第二招不要個個戶口都同一密碼，黑客、偽冒網站最叻就係收集你入過的密碼，然後再到不同網站試用；所以最好是所有戶口都用不同密碼。痛苦的是，點可以所有戶口都用唔同密碼呀？點記呀？其中一個大路的方法，是將你最常用的密碼混合相關戶口名稱，例如Facebook戶口，可以是Dyhtps!1789 Fac，而Google側是Dyhtps!1789 Goo。這個玩法變化多端，例如：Dyhtps! fk1789、Dyhtps!17 elgoog89等。
以上建議一般都夠對付Robot，望佢試撞密碼太多，網站發現白撞自動封號，但如果遇到比Robot、AI更勁的強力部門人力智能，就當冇睇過呢篇文。