富士康無報名參選百強企業

【明報專訊】內地有消息話，深圳日前公布2010年企業100強名單中，過去連續4年居榜首嘅富士康（2038）旗下鴻富錦精密工業，首次跌出排名榜，龍頭位置更被華為技術取代。

主辦方深圳巿企業聯合會等方面話，富士康今次係自己無報名參選，才搞到入唔到榜。不過，富士康舊年發生多宗員工跳樓自殺事件，搞到頂爺郭台銘要親身由台灣飛去大陸平息風波。及後佢哋公司另有高層向傳媒講，將縮減深圳廠區最多15萬員工，然後重新調整生產線，喺未來12個月在內地天津、河南省及其他城巿再招聘30萬名員工。

吉利母邀請開發新能源車

咁講法，唔知係咪員工跳樓事件，搞到富士康唯有離開深圳呢塊傷心地，連爭奪龍頭企業個位都無癮。之不過，富士康近排好似有番啲喜事，佢哋剛獲吉利汽車（0175）母公司吉利集團邀請，討論合作開發新能源汽車嘅計劃。