崔永元預告手握《手機2》男主角黑材料

【蘋果日報】馮小剛要開拍《手機2》，觸動到前央視主播崔永元神經，崔永元指因為男主角「嚴守一」係以佢做藍本，故事又拍到嚴守一個形象唔多好，所以老崔點會唔嬲，並開始「復仇行動」，而且佢並不孤單，因為內地女星袁立都加入佢陣營，同佢一齊聲討投資呢部戲嘅華誼兄弟公司。
日前華誼公司俾人踢爆，兩位主要股東王中軍同弟弟王中磊都將手頭上嘅華誼股票押晒俾銀行，有人擔心佢兩兄弟瘋狂套現動機。
崔永元喺微博寸爆華誼兄弟：「買這隻股票的可以哭了！」不過華誼前晚有澄清股權質押係常見投資形態，而袁立都嚟湊熱鬧，直接微博發話唔明佢兩兄弟嘅解釋：「甚麼意思？不懂！」之後又連續轉發好幾條關於華誼質押股權嘅新聞的微博。
到前晚10點幾，崔永元又喺微博留言暗示有《手機2》主角之一范偉嘅材料：「范偉老師，不好了，我家鏟屎官……看到你的材料了。」昨日《蘋果》聯絡過崔永元，問佢可唔可以詳細講吓，到底揸住范偉乜嘢材料？佢話：「不急！」謂適當時候會發佈，之前佢已講過，手握呢部戲主創人嘅材科，甚至會有人因此而坐監，睇嚟范偉有排瞓唔著。