「香港對有執着嘅年輕人較苛刻」

【蘋果日報】《地厚天高》這部有關梁天琦的紀錄片，去年底在灣仔藝術中心上映，導演林子穎曾「幻想過」可以在主流戲院上畫，但洽談失敗。「冇，一間都冇。」她苦笑。「我好想係嗰種啲人一落街就睇到，或者去旺角唱完K、食完雞煲就睇到。我拍嘅主題就係生活，你避唔到㗎，理論上套戲都應該係咁無孔不入，但係冇囉。」
「行主流路線商機處處」
22歲做導演，但日常如你我她。「其實我冇乜嗜好。我鍾意shopping囉，上網買衫同行街，買衫、買裙、買化妝品、買鞋；有時會入下戲院睇戲，不過好貴。做呢行冇乜收入，所以都唔係成日去。」她很少看電視，看也是Netflix或者「煲劇」那種。「鍾意睇啲開心啲，呢排喺ViuTV睇緊《大叔之愛》……」「睇戲就鍾意睇啲文藝啲嘅嘢，好鍾意睇古裝片，特別係英國人拍嗰啲，因為覺得佢哋啲對白寫得好靚，美國片就通常睇啲Indie片（獨立電影），不過都通常係有少少似笑片嗰啲嘅，或者輕鬆啲嗰啲，例如《Little Miss Sunshine》（《陽光小小姐》）嗰種風格。」
她希望繼續拍電影，「其實我自己袋嘅錢係好少，所以我都會做下嗰啲拍活動、拍廣告嗰啲，呢個係我一個比較大嘅收入來源。呢排冇乜點開工。我有機會都想有多啲嘅預算去拍大啲規模嘅嘢，可以係劇情片可以係紀錄片。但我想唞一唞、做吓啲唔同嘅嘢，因為過去幾年都做緊啲好沉重嘅嘢。」
都說當今香港的年輕人政治上、社會上都沒有出路。「我點睇呢個時代？我覺得係灰暗嘅，好多嘢變得好快、或者係急劇惡化，而你又好似做唔到啲乜去改變，所以年輕人喺呢個時代之下成長，或者啱啱出嚟接觸社會已經係接觸黑暗嘅面向，其實係好令人灰心。」比梁天琦還要年輕五歲的她，已是另一世代，「我覺得香港對有理想、有啲執着嘅年輕人比較苛刻。其實如果你行主流嗰條路，正正常常咁打份工、或者北上，都可以商機處處，過到啲幾好嘅日子。因為主流嗰條路太舒適，反而顯得你想做其他嘅嘢就好似好大阻力。」
不過，她依然相信走自己的路。「可能你身邊嘅人都唔會理解，但係我覺得，喺呢個時代之下都肯行一啲與別不同嘅路嘅人，係好難得。」