人權律師：政府用盡權力對付年輕人

【蘋果日報】梁天琦因暴動罪被囚6年，刑期比以往六七暴動及白石船民中心暴動等參與者更重。多名法律界人士認為梁的刑期明顯過重，指旺角騷亂在影響範圍、時間及暴力程度等都不及六七暴動，相信法庭欲藉此帶出不能容忍此類行為的訊息。有律師稱「好難過」，批評港府「比殖民地政府更用盡權力去對付年輕人」，質疑港府未有因旺角騷亂而反省，「究竟依家特區政府做緊啲咩？」
人權律師林耀強認為，梁天琦案的判刑明顯過重，因梁雖曾舉起雜物襲警，但他早已認罪，而暴動罪部份，其行為亦不如其他暴動事件般嚴重，卻要為當晚所有事故負上刑責，反映法例本身有問題。他指即使在殖民地時代，港英政府亦不會「用到咁盡嘅方式去處理（暴動人士），當時嘅六七暴動，（政府）都唔會好似今天我哋對待呢啲年輕人咁去處理，我哋政府喺50、60年後比殖民地政府更用盡權力去對付年輕人，聽到呢個消息好難過，明顯係過於嚴苛」。
料難上訴減刑
林指殖民地政府在六七暴動後曾反省管治不足，「依家嘅政府就唔係，可以告都告到盡，冇反省點解會出現呢個暴動，究竟依家特區政府做緊啲咩，遠遠比唔上殖民地政府」。
法政匯思成員吳宗鑾亦認為判刑過重，因為今次旺角騷亂在影響範圍、時間及暴力程度等都不及當年六七暴動，相信是法庭想帶出訊息，指不接納此類行為。吳宗鑾對梁上訴的成功率感悲觀，「睇返之前終審法院對呢類案件嘅態度，都係唔會容忍，相信（上訴成功）比較困難」。
港大法律系副教授戴耀廷則說：「感覺（判刑）係重咗，如果你相較以前嘅更暴力、更加大嘅行為，（判刑）都未至於咁重。」戴耀廷指即使謀殺案，法官也會考慮被告殺人的犯罪背景再決定判刑，「冇咩理由暴動案完全唔考慮呢啲因素」。
■記者鍾雅宜、姚國雄