民主派參政者無懼DQ　續呼結束一黨專政

【蘋果日報】不論中共如何用盡威嚇手段，港人支持平反六四之心仍然堅定，港大最新民調顯示，六四事件去到29周年，仍有逾五成港人支持平反六四，縱使全國人大常委譚耀宗聲言，支聯會「結束一黨專政」口號或違反憲法及《基本法》，港澳辦前主任王光亞直指叫喊有關口號者「應該不可以（參選）」，但港人仍然沒有退縮，而一班民主派參政者，亦無懼中共以DQ作威脅，繼續大聲高呼「結束一黨專政」口號，直至六四平反、中國、香港迎來真正民主。
記者：陳嘉裕
尹兆堅（民主黨立法會議員、支聯會常委）
「對於我嚟講，爭取中國民主，要求結束專政，並且希望國家可以有個民主自由制度建立，係我哋咁多年嘅堅持，我睇唔到有乜理由、有乜嘢人嘅威嚇，可以阻止我哋呢個信念，我唔會因為包括議席又好、人身安全又好，去放棄呢個信念，『結束一黨專政』係我嘅信念，我亦會繼續堅持爭取中國民主制度嘅建立。」
區諾軒（立法會議員）
「10年前（汶川大地震）傳媒訪問譚作人、今日亦好多傳媒訪問譚作人，但中國情形都係冇變過，好多村鎮死難者家屬同豆腐渣工程到今日都未被平反，同89年真相都係同樣未被平反，見到咁嘅情況都係好欷歔，但我依然會堅持叫支聯會嘅口號，特別係『結束一黨專政』……希望呢個口號唔會成為政權羅織罪名嘅工具，呢個亦係民主派咁多年嚟嘅堅持。」
劉小麗（2009年因曾蔭權的六四失言論，首次出席維園六四燭光集會、遭DQ立會議員）
「我自己對於政治理想或者一啲社會承擔，都係嚟自當時（即六四）嘅一啲睇法，所以呢啲不可磨滅嘅記憶同印象，唔會因為參選與否而改變，總之我哋莫忘初衷，爭取平反六四，並且叫過嘅口號都會再叫。『結束一黨專政』，都會再叫。」
陳淑莊（公民黨立法會議員、今年代表民主派於立法會提毋忘六四動議）
「『（結束）一黨專政』，我哋由1989年嗌到依家，但竟然今年較早前有人話呢句口號已經變成禁忌。香港仲係咪香港呢？香港係咪已經變成人治嘅地方呢？究竟邊個人話事？點解我哋唔可以再嗌『結束一黨專政』呢？所以一日六四未平反，我哋一日都會繼續爭取，『平反六四，結束一黨專政』。」