中環在線：利記輸波　渣打靠巴基之星沖喜

【蘋果日報】噚日係一年一度渣打（2888）遮打盃賽馬日，每年呢個時候渣打香港都會請該行嘅大客仔同傳媒，一齊入沙田睇馬順便聯誼吓咁。呢個時間記者朋友唔問加息、唔問市況，淨係專心「問貼士」！今次渣打香港大中華及北亞地區行政總裁洪丕正（Ben）對「巴基之星」呢隻明星馬信心十足，一嚟就二話不說揀佢！
帶挈記者贏錢
結果不負眾望，巴基之星喺2,400米賽事最後直路由第二位衝前上第一位，輕輕鬆鬆帶挈現場唔少記者朋友贏錢。無錯，雖然賠率唔係話好高，得1.7倍，即係買10蚊獨贏先賺得7蚊，不過贏粒糖仔開心吓都好嘅。
另一邊廂，渣打早前宣佈繼續贊助嘅英超聯勁旅利物浦，前晚對皇家馬德里場賽事認真蝦碌得可憐，利記門將卡利奧斯兩度嚴重失誤，最後將對手遠射擋入自己龍門，換來網民無限恥笑兼mean爆留言「話以後都應該唔會再見到卡利奧斯」咁話。
一連兩日渣打輸咗場波，贏番場馬，到底係搞邊科？Any肥，相信渣打嘅小股東都只係關心兩樣嘢㗎箒，股價同派息囉。
李華華
LiWaWa@AppleDaily.com