【聽我講】種花如種人　6呎暖男的花心

【蘋果日報】植物殺手，總有一個喺左近，就如小學生一人一花計劃，種死再買買完再死再買，好在，總有惜花人，早前在香港花卉展橫掃5個大獎、行年23的學生哥李載然，是其中之一：「湊大啲花，好玩過打機。」在數碼相立見影像、出個post即時可呃like的速食世界，這個6呎高大男生，花一年時間栽花，確實反潮流。只是，能將廿蚊雜苗種出花魁，還得多謝師父梁志添，這個那些年有建築師不做、全職教IVE仔的花癡：「教育同種花其實好似。」空間時間心機缺一不可，種花如種人，不會立竿見影，但值千金。
記者呂麗嬋
位於3樓的環保實驗室旁，有個小小溫室，種滿不同品種的紫羅蘭，七彩繽紛，是李載然和梁志添的栽花小天地。「你用心去照顧，一定有回報」。一個是出書教人在蝸居有機耕作的專業進修學院講師，一個是修讀樹木管理及保育課程的二年級學生，年紀相距30年，亦師徒亦師生，異口同聲。淋水、施肥、修剪，分盆，六呎高大男孩，不愛打機愛種花，放假到花墟尋寶，在其貌不揚的花苗中，找尋特別品種。「唔係貴就一定好，啲苗好多都只係十幾廿蚊」，載然說。
「我哋呢個採購部，基本上只有我哋兩個。」「一年前決定參賽，準備咗約一百株苗，揀其中20株參賽。」「揀那盆代表自己出賽，載然有優先權。」你一言我一語，由幾塊素葉開始，種出人見人讚的花魁，師徒倆在月前維園舉行的花卉展齊齊出賽，其中4盆以載然名義出戰的紫羅蘭，就橫掃5個大獎，打贏一眾高手，作為師傅的梁志添，比徒弟更高興：「見到佢咁投入做一件事，就好似見番以前嘅自己」。爸爸做維修、媽媽是清潔工，總有一、兩盆紫羅蘭放在廁所，自小愛大自然的載然，與花結緣順理成章。
「梁Sir教種植，有次落堂，就捉住問佢點種紫羅蘭，傾落先知佢係高手」。就是惜花，小心翼翼帶著垂死的花，到梁志添的小溫室「救命」，如進入大觀園。「紫羅蘭有上萬個品種，原來修剪一塊葉都有學問」。如何落刀、何時施肥，看著小苗一天天成長。別的年輕人愛打理「網上花田」，用虛擬貨幣買花種花，他卻醉心現實世界的七彩顏色、聞得到的花香。「唔見一日，真係會茶飯不思」。家住大埔，載然說放假會回學校「睇住啲花」：「淋吓花，修吓啲葉，好專心，唔覺意就兩、三個鐘」。載然說。
有說「鍾意就係天份」，大扺有幾分道理。由「淋花都怕佢搞死啲花」到「成個花架放心交俾佢」，梁志添直言「退休前難再遇見另一個載然」。畢竟在速食世界，24小時已太長，耐心等候慢慢成長的感覺，種花惜花，在今日，古早得很。「教育同種花，其實好似，需要空間、時間同心機，你唔會知那個學生有成就、唔知邊個會跑出，但你用心去種、用正確的方法去種，就算唔係花魁，都一定會開花結果」。尋覓自己專長，刻苦努力堅持做熱愛的事，成長需要時間，就像人。
教了30年書，梁志添自然深明此理。「千里馬很多，要隻千里馬遇上伯樂卻好難」。他大笑。前身工業學院的IVE，最多被認定「讀書不成」的學生，對比「贏在起跑線」的梁志添，確大不同。中學讀男拔莘、84年港大建築系畢業，這個超級花癡，生於經濟起飛、房地產建築師識生金蛋的年代，但畢業後，卻偏偏執意執教鞭，作育英才。「實習時喺夜校教建築同會計，我發現自己好鍾意教書，佢哋都係成年學生，錯過咗讀書嘅黃金機會，但就比一般人更加勤力」。30年過去，他還記得接過成年學生送他感謝信時的感動。
梁志添說，有些花，沒有適當土壤，浪費了，但幫忙施施肥、修修葉，仍能開出美麗的花。實習後同學紛紛掛牌執業，開自己的建築師樓，他卻走進當年的職訓局，一教30年。中學是男拔中樂團二胡手的他，工餘義務在IVE任指揮、組合唱團；又在校園爭取擴展溫室，鼓勵學生參與種植，訓練責任心，學習珍惜，甚至組隊參與絕少年輕人問津的公開花卉比賽：「好多人話志在參與，唔好在乎輸贏，但贏其實係幾緊要，見到師兄種花種到攞冠軍，就有動力對自己更有要求」。是不是千里馬都好，還需遇上生命中的伯樂，信焉。