【電影大師班】張志明公司係點？彭浩翔：全部刪晒！

【蘋果日報】彭浩翔踩入蘋果！為咗提高動新聞質素，電影大師班請咗彭浩翔導演，同同事分享吓電影創作心得。
彭浩翔今次演講主題係「Storytelling（講故事）」，佢認為無論係拍3分鐘新聞片，定係拍100分鐘電影，都有時間限制，最重要搞清楚自己想講乜。
彭導話《志明與春嬌》得雞碎咁多製作費，點樣有效地分配資源呢？佢話，「我認為呢套戲最重要有真實感，要好似紀錄片咁，所以一班人食煙嘅戲，我要兩部機一齊拍！」解釋吓先，如果用一部攝影機拍戲，每次只能拍一個角度，所以同一場戲，演員要做幾次，盡量做返一模一樣嘅動作，唔同角度嘅拍攝先可以連接，而兩部機就唔使重演，唔會有穿崩位，亦較真實。
對於「兩部機同時拍」呢個諗法，彭導嘅製片回應：「你都黐Ｘ線！邊有咁多錢畀你兩部機！」因為唔止器材，連人手包括攝影師、助手、燈光師都要雙倍，價錢自然雙倍。不過，彭導好清晰自己想要咩，佢就作出決定話，「我認為張志明嘅公司係唔重要，我將全部張志明公司嘅戲都刪晒佢！」
當有好嘅plot（劇情），製作班底需要賦予電戲一個深層意義，即是theme（主題）。彭浩翔介紹咗一套佢好鍾意嘅電影《Die Hard》，認為佢同所有動作片最大嘅分別，在於潛藏故事，「《Die Hard》唔係講恐怖分子挾持人質，而係講夫妻危機，相信無乜人會記得最後嗰場戲，兩夫妻喺危急關頭，一齊解開隻勞力士自救，嗰隻勞力士就象徵咗太太為工作犠牲婚姻，最後放棄工作同丈夫復合。」表面激烈嘅打鬥場面，需要有潛藏嘅愛情故事支撐，兩層故事同步推進，就係講故仔最重要嘅核心。
彭浩翔話自己都唔係一開始，就明白點樣寫一個好劇本，係畀人鬧得多先開竅。佢分享自己嘅第一份工，喺亞洲電視綜藝節目部做編劇，「第一次畀主持胡大為提起我個名嘅時候，就喺個廠度，全世界都望住，胡大為話，『邊Ｘ個係彭浩翔？出嚟！呢份稿到底寫咩？』我話咪寫咗場戲囉，胡大為好傷心等佢女朋友，咁佢話，『點樣表達好傷心』，我話，『我唔係演員喎...』佢話，『你個冚Ｘ剷出嚟，你做一次畀大家睇點樣好傷心！』」彭導話當時都唔明胡大為鬧緊乜，胡大為就舉例，「餐廳枱面有朵花，你可以寫話，叫我一路等，睇錶，一路搣朵花，然後等觀眾去感受我嘅傷心，而唔係叫我做一個傷心嘅表情。」之後佢要求彭浩翔每一次開廠都要參與演出，結果就令彭導開竅，「當我做演員嘅時候，就感受到『呢個劇本邊個寫㗎？係咪人寫㗎？啲對白點講呀？』原來我寫嘅劇本，無我想像中咁好。」
電影同新聞最大嘅分別，係新聞好多時無得預計，有同事就問彭導，「平時你有晒故仔先拍，但係我哋好多時係拍完，先再諗點樣剪，點樣可以做好啲？」彭導都靜咗靜，諗咗陣，老實話，「撞手神㗎咋喎！」彭導話呢種情況佢都遇過，就係拍《公主復仇記》，偷裸照事件係佢嘅親身經歷，佢再花時間重組意義畀嗰個經歷，不過佢坦言，「我有九個月去重組，咁你哋可能有九個字？」最後，彭導都大讚動新聞嘅同事其實做得幾好，喺要處理眾多新聞資訊下，如果有一次能夠搵到深層意義去拍，就已經唔錯。