中環在線：靚仔又火爆百富環球前CFO加盟火幣

【蘋果日報】Out！兩年前「一鬧成名」嘅百富環球（327）前CFO李書沸（Chris）有新着落，正式加盟火幣集團做董事會秘書兼國際商務拓展副總裁。有媒體就引用咗佢嘅入職信，勁讚火幣係一流區塊鏈（Blockchain）服務商。雖則新人擦新老細鞋在所難免，但講到公司執行得當的話，將遠勝投行高盛，又會唔會誇咗少少呢？
會議趕人成中環笑柄
提到靚仔Chris大家可能未必即刻有印象，但講到佢兩年前戰績，即喺會議上趕走分析員而震撼全中環一役，相信大家乜嘢回憶都返晒嚟，若然仲未有印象，不妨睇返當年趕人片段再回味。Chris當年因為呢件事成為中環笑柄實在太慘，除咗影響靚仔形象，仲拖累公司股價，最後不得不黯然離開，加盟比特幣交易平台OKCoin做CFO，實行由Block人轉為做Blockchain。
所以今次加盟火幣都不令人意外，只係延續佢對Blockchain嘅愛，而華華就希望呢份愛與和平，可以繼續擴散開去。
李華華
LiWaWa@AppleDaily.com