吳啟明生活大起大落富貴時曾有保鑣隨行

【蘋果日報】54歲嘅吳啟明是吳啟華哥哥，大過吳啟華1歲，但要到87年先參加藝員訓練班入行，比吳啟華遲4年，兩人發展亦大不同。雖然吳啟華喺事業上經歷過高低起跌，戲路亦有很大反差，由反派演到三級片主角，但最終憑劇集《妙手仁心》程至美醫生成功入屋；相反，吳啟明喺大台發展期間一直未有代表作，最令人有印象，都只係夥拍鄭少秋、劉青雲等人拍《大時代》，於四隻蟹仔中演秋官三子「丁旺蟹」。
吳啟華曾於一次專訪中提及哥哥吳啟明，他稱吳啟明唔想拋頭露面，最初對加入娛樂圈反感，曾經做過航空地勤，最後要等到自己離開大台，吳啟明先去考藝訓班。吳啟華又覺得自己嘅反派形象鮮明，影響咗哥哥發揮，對哥哥唔公平。
有認識吳啟明嘅人，會以「傳奇」來形容，全因吳啟明多年生活大起大落。吳啟華過去受訪亦曾經自揭生於賭博世家，90歲高齡嫲嫲當年過大海，一口氣連過三關，結果心臟病發，在賭枱上猝逝；吳啟華跟哥哥都深受影響，自小鍾意賭博。
吳啟明離開娛樂圈後，曾轉做投資顧問及保險經紀，有傳曾因炒股致欠債過千萬，又試過在街頭被人伏擊，又因為連番打擊患過抑鬱症，多年來過着「三更貧五更富」生活，富貴時身邊有保鑣隨行，家住半山豪宅；如果「運滯」嗰排就會突然在朋友圈中人間蒸發，行蹤十分飄忽。
感情方面，吳啟明甚少向人提及，加上他一度「斷六親」，故關於他感情生活十分神秘，唯一緋聞是當年傳佢與現年40歲嘅任港秀拍拖。